Greqia po kalon një situatë katastrofike si pasojë e zjarreve që kanë rrethuar Athinën. Të paktën 50 persona kanë humbur jetën deri tani dhe mbi 150 të tjerë raportohet se janë plagosur.
Mes viktimave dhe të plagosurve ka edhe fëmijë. Mijëra qytetarë kanë braktisur banesat dhe janë larguar ku të munden larg flakëve.
Sipas mediave greke zjarri ka djegur mbi 1 mijë banesa dhe qindra automjete.
Shumë qytetarë i janë drejtuar detit për të gjetur shpëtim ndërkohë qeveria greke ka kërkuar ndihmë nga jashtë pasi situata është jashtë kontrollit dhe e papërballueshme për autoritetet.
Lidhur me situatën ka reaguar edhe ambasada shqiptare në Greqi. Përmes një njoftimi ambasada bën me dije se nuk ka shtetas shqiptarë të lënduar deri tani.
“Ambasada shqiptare në Athinë shpreh ngushëllimet e saj më të sinqerta për familjet e viktimave të zjarreve në Greqi, ndërsa shprehim mbështetjen tonë të plotë ndaj autoriteteve greke. Theksojmë se Ambasada është vënë menjëherë në kontakt me qytetarë shqiptarë të zonave të prekura, ndërsa i bëjmë thirrje që për çdo nevojë t’i drejtohen Ambasadës në nr. +30 6941658183”- thuhet në njoftimin e ambasadës shqiptare./a.m.
