Nga Ardit Rada
Një shkrim që u bë i njohur vetëm pas veprimeve të policisë së Tiranës ndezi një tjetër furtunë në filxhanat e kafesë së skenës politike. Kastriot Myftaraj përmes lidhjeve që vetëm ai di ti gjejë, kishte arritur në konkluzione sa të pabesueshme po aq edhe të dënueshme nga çdo njeri dhe ligj në çdo cep të botës. Megjithatë, shkrimi mund të gëlltitej edhe si i vërtetë nga lexuesit nën nivelin mesatar të inteligjencës dhe që përbëjnë kryesisht popullatën më të madhe në rrjetet sociale. Arsyet pse autori guxoi në atë lloj sulmi mund të jenë të shumta, por për dikë që e njeh Myftarajn do ta mirëkuptonte përveç pjesës ku nxiste vrasjen e ambasadores së Bashkimit Evropian në Tiranë.
Ka dy shtylla të rëndësishme në Shqipërinë tonë që dita-ditës po frymëzojnë këto lloje thirrjesh, deri në makabritet. Së pari sot kemi një opozitë që përveç qëndrimit antiligjor në mes të bulevardit për 3 muaj pa 8 ditë, në vijim ka tentuar të anatemojë ambasadorët perëndimorë. Herë duke i paraqitur si të krisur që flasin me kokën e tyre dhe herë si sorosianë, komunistë apo të korruptuar. Po kjo opozitë, që po mban peng normalitetin e shtetit, ka ushqyer tezat e Kastriot Myftarajt që me gjasë është edhe ithtar i çadrës. Por bindjet politike të autorit të shkrimit për Romana Vlahutin është gjëja e fundit që duhet të na interesojë, ndërsa se nga ka ardhur nxitja nuk do mend për ta kuptuar. Lulzim Basha në ditët e para të çadrës bëri thirrjet më të rënda që një politikan i nivelit të lartë mund t’ia drejtojë publikut. Nuk është nevoja të citojmë në ligjëratë të drejtë se ç’u tha nga Basha për tërheqjet zvarrë, thyerjen e xhamave apo çarjen e gomave. Grushtat dhe shkelmat ndaj zyrtarëve e të tjera.
Shtylla e dytë është një institucion tepër i rëndësishëm për zbatimin e ligjit në vend. Fatkeqësisht Prokuroria e Përgjithshme është përgjegjësja kryesore për dobësimin e besimit të qytetarëve te ligji dhe për më shumë te Policia e Shtetit. Akuza më e fundit ndaj policisë ishte ajo se nuk ka transparencë në asgjësimin e hashashit. Dhe se ku ka dashur të dalë autori me këtë deklaratë, s’do shumë mend të kuptohet. Institucioni që premton arrestimet e bujshme çdo shtator ka lejuar që thirrjet publike për dhunë të kthehen në trend. Adriatik Llalla ka për borxh të çojë në gjyq në mungesë shqiptarët e ISIS që kërcënojnë nga YouTube, por jo ata që herë me mikrofon nga qendra e Tiranës dhe herë me tastjerën e laptopit nga ndonjë kafene kërkojnë vrasje e shkatërrim prone publike.
Organi i akuzës duhet të na thotë përse për thirrjet e Bashës që do thyente xhama pranoi procedim penal, ndërsa Myftarajn që kërkon vrasjen e Vlahutinit e nxjerr nga biruca? Përse hetimet për nxitje dhune nga kreu i PD nuk kanë përfunduar pas kaq kohësh? Kastriot Myftaraj nuk ka pikën e fajit në këtë maj aspak të qetë dhe Prokuroria bëri mirë që e nxorri nga biruca e policisë. Është i fundit që duhet gjykuar pse thotë se çfarë mendon. Sepse dikujt në këtë vend i është lënë mikrofoni në qendër të kryeqytetit për të na dhënë leksione demokracie dhe për t’i bërë leckë ambasadorët perëndimorë sa herë që zgjohet keq. /javanews/
