Aktori i njohur dhe profesori i Universitetit të Arteve, Kastriot Çaushi shprehet pro ndërtimit të një Teatri të ri Kombëtar, për gjendjen aktuale të të cilit thotë se është shumë i amortizuar. Ai vlerësoi edhe dëgjesën me artistët të zhvilluar nga kryebashkiaku Erion Veliaj, sepse sipas tij ishte një mundësi shumë e mirë për të folur.
“Kur kalon në njëra anë e skenës në tjetrën duhet të bësh shumë kujdes nga amortizimi; në dimë spektatori i rregullt ka ftohtë, vapë në verë. Prandaj e dua patjetër një ndërtesë të re për qytetin tim, për vendin tim”, shprehet Çaushi.
Sa i përket diskutimit mbi mundësinë e rikonstruksionit të godinës aktuale të Teatrit Kombëtar, ai rrëfen edhe një rast të ngjashëm për godinën e Akademisë së Arteve, ku pavarësisht se u thirrën ekspertët më të mirë për rehabilitimin e linjës elektrike dhe të rrjetit hidraulik, askush nuk e merrte dot përsipër për shkak të amortizimit.
“Kemi pasur një rast në Universitetin e Arteve, na u prishën dritat në ndërtesën kryesore, erdhën ekspertët më të mirë dhe më thane: Nuk mund ta prekim dot sepse është linjë elektrike e vitit 1939. Nëse fusim duart na ngelen telat në dorë, nëse fusim duart te uji, na ngelen tubat sepse janë të vitit 1939. Pra, kjo duhet diskutuar me sy objektiv. A mundet që të ristrukturohet një ndërtesë e ndërtuar në 1939 me këtë rrjet elektrik, me këtë rrjet hidraulik, me këtë peshë apo jo?”, shprehet Çaushi.
a.ç
