Llogaria e email-it të Drejtorit të FBI-së, Kash Patel, është hakuar nga një grup i lidhur me Iranin, duke bërë që mesazhet dhe fotografitë e tij private të publikohen online, ka konfirmuar vetë agjencia.
Grupi, i njohur si Handala Hack Team, ka publikuar në faqen e tij të internetit një CV të pretenduar të Patel-it dhe disa foto të tij, së bashku me një deklaratë ku thuhet: “Kjo është vetëm fillimi ynë.”
Në deklaratë thuhet gjithashtu: Nëse drejtori juaj mund të komprometohet kaq lehtë, çfarë prisni nga punonjësit në nivele më të ulëta? Agjencia FBI ka sqaruar se informacioni i marrë është “historik dhe nuk përfshin asnjë informacion qeveritar.”
Ky nuk është hera e parë që hakerët e mbështetur nga Irani synojnë Patel-in; ai ishte objektiv edhe në vitin 2024, disa javë para emërimit të tij në FBI.
Fotografitë, të cilat Handala pretendon se i ka marrë nga llogaria e Patel-it, po qarkullojnë në rrjetet sociale me logon e grupit të vendosur si ëatermark. Ato tregojnë Patel-in në vende të panjohura, duke qëndruar pranë një veture konvertibile vintage, duke buzëqeshur pranë një avioni, duke pirë dhe nuhatur cigare, duke bërë selfie pranë një shisheje alkooli, si dhe duke pozuar në restorante dhe hotele të ndryshme.
BBC nuk ka verifikuar në mënyrë të pavarur dokumentet e rrjedhura. Në deklaratën e saj mbi hakimin, grupi Handala pretendon se “sistemet e ashtuquajtura ‘të papërshkueshme’ të FBI-së ranë në gjunjë brenda orësh nga ekipi ynë”. “Kjo është siguria për të cilën krenohet qeveria amerikane?! Ky është gjigandi kibernetik që mendon se kërcënimet dhe ryshfeti mund të heshtin zërin e rezistencës?!”
FBI ka njoftuar se po ofron deri në 10 milionë dollarë për informacion që ndihmon në identifikimin e anëtarëve të grupit Handala.
Së fundmi, Departamenti i Drejtësisë i SHBA-së sekuestroi disa emra domain-i të Handala-s që thuhet se ishin përfshirë në skema hakimi të lidhura me Republikën Islamike të Iranit. Departamenti tha se Ministria e Inteligjencës dhe Sigurisë e Iranit (MOIS) kishte përdorur faqet e Handala-s për të përhapur “propagandë terroriste,” për të kryer “operacione psikologjike kundër kundërshtarëve të regjimit,” për të marrë kredit për aktivitetet e hakimit dhe për të kërkuar vrasjen e gazetarëve dhe disidentëve.
Grupi Handala tha se hakimi i llogarisë së Patel-it ishte hakmarrje për sekuestrimin e faqeve të tij nga FBI-ja, si dhe për shpërblimin prej 10 milionë dollarësh që ofroi agjencia për informacion mbi sulme të ngjashme kibernetike.
Më parë këtë muaj, grupi Handala kishte marrë përgjegjësinë për sulmin kibernetik ndaj kompanisë amerikane të teknologjisë mjekësore Stryker. Sulmi kishte çuar në shkatërrimin e të dhënave dhe defaktimin e aksesit të punonjësve, me pretendimin se më shumë se 200 mijë sisteme, serverë dhe pajisje mobile ishin prekur dhe u morën 50 terabyte të dhëna kritike.
Grupi deklaroi se sulmi ndaj Stryker-it ishte “hakmarrje për sulmin brutal” ndaj një shkolle për vajza iraniane në fillim të luftës, që la mbi 160 të vrarë, si dhe “për përgjigje ndaj sulmeve kibernetike të vazhdueshme kundër infrastrukturës së Iranit dhe aleatëve të tij.”
