Nga dosja hetimore e Prokurorisë së Krimeve të Rënda mësohet se Fadil Kasemi, vrasësi i gjyqtares Fildes Hafizi, ka tentuar të largohet nga vendi i ngjarjes pasi kreu krimin.
Por ‘heroi’ në këtë rast ka qenë shoferi i një furgoni, i cili e futi direkt e në komisariatin Nr.1
Pasi kreu krimin, Fadil Kasemi me psitoletën në dorë i ka dalë përpara një automjeti të rastit që po udhëtonte në drejtim të rrugës “Bardhyl”, automjetit furgon Benz Mercedez, që drejtohej nga shtetasi K.T., të cilit i ka thënë se kishte vrarë bashkëshorten e tij dhe nën kërcënimin e armës i ka kërkuar atij që ta largonte nga vendi i ngjarjes, duke hypur brenda në automjet.
Gjatë udhëtimit shtetasi K.T.ka përshkuar rrugën që të dërgonte pranë Komisariatit të Policisë nr.1 Tiranë.
Në kohën që i është afruar Komisariatit, shtetasi K.T. e ka futur menjëhërë automjetin e tij brenda në ambjentet e Komisariatit të Policisë, ku në këtë moment janë afruar menjëhërë punonjësit e policisë, të cilët kanë ndërhyrë dhe kanë bërë kapjen në flagrancë të shtetasit Fadil Kasemi, duke i hequr armën pistoletë që mbante në duar.
