Pas eliminimit të “armikut nr. 1”, Jahja Sinwar, organizatori dhe mbështetësi i masakrës së 7 tetorit, Izraeli nis të ushtrojë presion mbi palestinezët në Gaza dhe mbi Hamasin për të liruar rreth 100 pengje, ende të burgosur prej 379 ditësh.
Për të mbyllur këtë çështje, qeveria izraelite mund të përdorë edhe trupin e Sinwar-it, të ruajtur në një vend të panjohur, si një “mall pazari” për lirimin e tyre, shkruan A2.
Dy burime i thanë CNN se ky shkëmbim është ndoshta e vetmja mënyrë që eshtrat e Sinëarit të kthehen në Gaza.
Forcat e Mbrojtjes së Izraelit e vranë liderin e Hamasit, Yahya Sinwar, gjatë një sulmi në Gaza.
Yahya Sinwar, i lindur në vitin 1962 në Khan Yunis kaloi më shumë se njëzet vjet në burgjet izraelite deri në vitin 2011, ku mësoi hebraisht.
I njohur me pseudonimin “Kasapi i Gazës”, ai ishte ndër themeluesit e krahut ushtarak të lëvizjes islamike palestineze Hamas, Brigadave al-Qassam, dhe konsiderohet nga Izraeli si organizatori i sulmit të 7 tetorit 2023 në të cilin u vranë më shumë se 1200 njerëz, përfshirë ushtarë dhe civilë, raporton A2.
Sinwar u arrestua në vitin 1989 dhe u dënua nga Izraeli me katër burgime të përjetshme për rrëmbimin dhe vrasjen e dy ushtarëve izraelitë dhe katër palestinezëve të akuzuar për bashkëpunim.
Gjatë 22 viteve të tij në burg, ai u shfaq si një lider karizmatik dhe i pakompromistë për pozicionet e tij radikale, duke u bërë një pikë referimi edhe për të burgosurit që nuk ishin të lidhur me Hamasin.
Lirimi i tij erdhi në vitin 2011, si pjesë e një marrëveshjeje midis lëvizjes islamike dhe Izraelit për të liruar ushtarin izraelit, Gilad Shalit, në këmbim të të burgosurve palestinezë.
Pas kthimit në Gaza, Sinwar u ngrit shpejt në radhët e udhëheqjes së Hamasit. Ai besohet të ketë qenë pas vrasjes në vitin 2016 të një komandanti të lartë të Hamasit, Mahmoud Ishtewi, në një luftë të brendshme për pushtet.