Edhe ky sezon turistik duket se po shënon rekorde të reja në fluksin e turistëve dhe pushuesve në Shqipëri.
Saranda vijon të jetë një nga destinacionet më të frekuentuara turistike në jug të Shqipërisë, duke tërhequr çdo verë mijëra vizitorë vendas dhe të huaj.
Kryeministri Edi Rama ka ndarë sot (22 gusht) pamje nga Saranda në muajin gusht me një video-mesazh në rrjetin social, ku bie në sy bregdeti i qytetit dhe prania e një anijeje turistike në ujërat përballë tij.
“Mirëmëngjes! Dhe me këtë kartolinë gushti nga Saranda, ju uroj një fundjavë të mbarë”, shkruan ai në postimin karshi videos.
Pamje të tilla pasqyrojnë fluksin e turistëve që zgjedhin rivierën shqiptare gjatë sezonit veror, ndërsa Saranda mbetet një prej pikave kryesore të turizmit bregdetar në vend.
Qyteti njihet për ujërat e kaltra, plazhet, gjirin e Sarandës dhe afërsinë me destinacione të tjera turistike, duke e bërë atë një prej zonave më të vizituara gjatë muajve të verës.
