Kuvendi i Shqipërisë ka shqyrtuar sot marrëveshjen për ratifikimin e financimit të projekteve që synojnë përmirësimin e rrjetit të transmetimit dhe shpërndarjes së energjisë elektrike në veri të vendit, pas dëmeve të shkaktuara nga tërmeti i vitit 2019.
Gjatë fjalës së tij, Ministri i Energjisë dhe Infrastrukturës, Enea Karakaçi, e cilësoi marrëveshjen si një hap të rëndësishëm për modernizimin e sektorit energjetik dhe garantimin e furnizimit të qëndrueshëm me energji elektrike.
“Është kënaqësi sot për mua të vij të paraqes këtë marrëveshje shumë të rëndësishme që ka të bëjë me përmirësimin dhe modernizimin e rrjetit të shpërndarjes së energjisë elektrike në veri të Shqipërisë,” – u shpreh Karakaçi.
Ministri theksoi se objektivat kryesore të marrëveshjes janë rritja e sigurisë teknike të rrjetit, garantimi i furnizimit të qëndrueshëm, përballimi i kërkesës në rritje për zonat urbane, përmirësimi i treguesve të performancës dhe ulja e humbjeve teknike.
“Objektivat kryesore që përmban kjo marrëveshje janë rritja e sigurisë teknike të rrjetit, garantimi i furnizimit të qëndrueshëm me energji elektrike, përballimi i kërkesës në rritje për zonat me zhvillim urban, përmirësimi i treguesve të performancës, si dhe ulja e humbjeve teknike në rrjet,” – tha ai.
Në kuadër të marrëveshjes parashikohet ndërtimi i nënstacioneve të reja në Shëngjin dhe Fushë-Krujë, rindërtimi i nënstacionit Shkodra 2, si dhe instalimi i sistemeve moderne të telekontrollit. Karakaçi kujtoi se vetëm gjatë viteve 2023–2026, OSHEE ka investuar rreth 32 milionë euro në qarqet veriore Shkodër, Lezhë, Kukës dhe Dibër.
“Janë ndërtuar dhe rikonstruktuar 2 nënstacione dhe disa linja 35kV, kemi shtruar mbi 600 km linjë të tensionit të mesëm dhe të ulët. Janë riparuar me dhjetëra kabina ku përfitues janë mbi 200 mijë banorë dhe biznese të shumta të këtyre qarqeve,” – deklaroi ministri.
Ai u ndal veçanërisht te qarku i Shkodrës, duke përmendur ndërtimin e nënstacionit të Velipojës dhe zgjerimin e rrjetit në zonat turistike, si dhe projektin e lidhjes energjetike Bogë–Theth, që për herë të parë do t’i japë Thethit furnizim të qëndrueshëm me energji.
“Për herë të parë është e parashikuar në planin e investimeve të Operatorit të Sistemit të Shpërndarjes lidhja Bogë–Theth, për t’i dhënë edhe Thethit lidhjen energjetike me të gjithë sistemin energjetik të vendit,” – theksoi Karakaçi.
Në Lezhë është përfunduar ndërtimi i nënstacionit dhe fiderat që sigurojnë furnizimin e Shëngjinit, ndërsa në Dibër dhe Kukës janë realizuar investime në rrjetin e tensionit të mesëm e të ulët, përfshirë vendosjen e kabllove moderne në zonat turistike si Valbona.
Ministri Karakaçi theksoi se falë këtyre investimeve, pritet që deri në vitin 2026 humbjet teknike të ulen në nivelin 16%, ndërsa arkëtimet të arrijnë 100%, duke e vendosur sistemin energjetik në një gjendje të shëndoshë financiare.
“Sot ne parashikojmë që vitin 2026 ta mbyllim me nivel humbjesh rreth 16%, që është një nivel krejtësisht i paimagjinueshëm me nivelet e humbjeve ku kemi qenë, si dhe me nivel arkëtimi 100%,” – u shpreh ai.
Karakaçi u bëri thirrje deputetëve që të miratojnë marrëveshjen, duke e cilësuar si një hap të rëndësishëm për sigurinë energjetike të veriut dhe për përmbushjen e standardeve europiane në sektorin elektroenergjetik të vendit.
“Si e tillë ju propozoj që ta miratoni këtë marrëveshje, pasi ka një element shumë të rëndësishëm, sidomos për zonën e veriut që ka patur problematika më të gjera,” – përfundoi ministri.
