Gjykata për Krime të Rënda ka lënë në burg pesë personat të cilën u arrestuan për trafikun e 1.3 ton kanabis në Kavajë.
Paraditen e sotme Gjykata njohu me masën e sigurisë Jani Sadikaj, Kejvi Hajdarin, djalin e ish-shefit të krimeve në Gramsh, Roland Hysenbelliun, Aristotel Kasaj dhe Arvis Muçaj.
Ata mohuan se kishin lidhje me sasinë e drogës së sekuestruar, por Prokuroria ka pasur prova të mjaftueshme për t’i kërkuar trupit gjykues lënien e tyre në qeli.
Tre të rinjtë deklaruar se në Kavajë ndodheshin për drekë, ndërsa në kthim kanë humbur rrugën dhe për këtë shkak kanë kërkuar ndihmë nga një patrullë policie.
Por detaji që tradhton të dyshuarit, është një përgjim në ambientet e policisë së Kavajës, pasi ata ishin shoqëruar.
Joni Sadikaj ka porositur dy shokët e tij Kejvi Hajdaraj dhe Roland Hysenbelliu që të mohojnë akuzat dhe të mos flasin përpara policisë, kjo për të shmangur dëshmitë kontradiktore.
Në këtë moment, policia i arreston tre të rinjtë, të dyshuar si posedues të lëndës narkotike.
5 personat janë përfshirë në tentativën për trafikimin e rreth 1.3 ton kanabis sativa, e cila u zbulua katër ditë më parë në zonën e bregdetit të Kavajës.
Sasia prej 1,3 tonë drogë, e cila u kap katër ditë më parë në Kavajë teksa transportohej drejt plazhit të Gjeneralit për t’u nisur për trafikim në Itali, vinte nga zonat e Tepelenës.
Prokuroria për Krime të Rënda, në bazë të hetimeve paraprake, ka siguruar të dhëna, të cilat krijojnë dyshime të arsyeshme për përfshirjen e 5 personave të ndaluar me urdhër të Prokurorit. Hetimet nisën, pas zbulimit nga Policia e Kavajës të mbi 1.3 ton kanabis sativa, katër ditë më parë.
Të enjten në mbrëmje, Policia e Kavajës zbuloi dy mjete, një furgon dhe një fuoristradë Land Rover, një sasi prej 1350 kg lëndë narkotikë (konkretisht, 1 ton u gjet në furgon dhe 350 kg në mjetin fuoristradë “Land Rover”). Personat që gjendeshin në këto dy mjete janë larguar me shpejtësi.
Në vijim u shoqëruan në Komisariat 3 shtetas, të cilët gjendeshin në një veturë tip SAAB, pranë vendit ku u gjend lënda narkotike. Këta shtetas u identifikuan: Kejvi Hajdari, Roland Hysenbelliu dhe Joni Sadikaj. Sipas akuzës, veprimet hetimore u drejtuan nga Prokuroria e Kavajës, e njoftuar për ngjarjen nga ana e Policisë lokale.
DËSHMITË KONTRADIKTORE
Me zbulimin e skafit, grupi hetimor krijoi dyshimet se lënda narkotike ishte për qëllim trafikimi dhe, për këtë arsye, hetimi i kaloi për kompetencë Prokurorisë për Krime të Rënda. Kjo e fundit ka marrë deklarime nga të ndaluarit, të cilët kanë dhënë shpjegime kontradiktore.
Pas marrjes në pyetje të tre personave të shoqëruar, si edhe pas identifikimit të dy personave të tjerë që kishin lidhje pronësie apo përdorimi me mjetin tip fuoristradë ku u gjet një pjesë e lëndës narkotike (rreth 350 kg), Prokuroria urdhëroi ndalimin e të pestëve, si persona të dyshuar për përfshirje në veprën penale të “Trafikut të lëndëve narkotike”.
ROLET NË TRAFIKIM
Bazuar në provat e mbledhura Prokuroria për Krime të Rënda ka krijuar dyshime të arsyeshme për përfshirjen e tyre, në bazë të të dhënave paraprake, si më poshtë: Kejvi Hajdari, Joni Sadikaj dhe Roland Hysenbelliu kanë deklaruar se janë nisur nga Tepelena me mjetin tip Saab, të drejtuar nga Kejvi Hajdari, për t’u ulur për drekë në Kavajë. Pasi kanë përfunduar drekën, në mbrëmje vonë janë nisur për t’u kthyer, por kanë humbur rrugën në zonat rurale të Kavajës.
Ata kanë konstatuar një patrullë policore, të cilët e kanë pyetur për rrugën, por në këtë moment, ata janë shoqëruar nga ana e Policisë. Ata mohojnë përfshirjen në trafikun e narkotikëve. Por, në bazë të veprimeve hetimore, rezulton se për shtetasit Kejvi Hajdari- ai deklaron se ka qenë nën drejtimin e mjetit Saab, por rezulton se ai ka përdorur gjatë ditës së enjte edhe kamionçinën, e sekuestruar tashmë, e cila gjendej e mbyllur pranë një karburanti në Kavajë.
Po kështu, për shtetasin Roland Hysenbelliuai deklaron se ka qenë pasagjer në mjetin e drejtuar nga Kejvi Hajdari dhe ishin për drekë shoqërore në Kavajë. Ndërkohë, në Kavajë është gjetur një tjetër mjet i mbyllur, Toyota, i cili rezulton të jetë blerë nga një familjar i tij rreth dy muaj më parë në Tepelenë.
Nga ana tjetër, në lidhje me Joni Sadikaj, në furgonin ku u zbulua 1 ton lëndë narkotike, u gjet edhe një kartë telefonie celulare. Në bazë të veprimeve hetimore, rezultoi se kjo kartë është blerë në Tepelenë nga një shtetas, i cili nuk e kishte përdorur asnjëherë, por ia kishte dhënë shtetasit Joni Sadikaj.
Pas ndalimit të tre personave të mësipërm, Prokuroria për Krime të Rënda urdhëroi ndalimin edhe të shtetasve: Aristotel Kasaj dhe Arvis Muçaj. Ata rezultojnë të kenë lidhje me pronësinë e mjetit tip fuoristradë, në të cilën u gjend rreth 350 kg lëndë narkotike.
Ata kanë mohuar të jenë përfshirë në veprimtarinë e trafikimit të lëndës narkotike. Gjithsesi, ata kanë dhënë dëshmi mbi tjetërsimin e pronësisë së mjetit, të cilat po verifikohen në vazhdim.
a.ç
