Hashim Thaçi dhe shefi i ekzekutivit Ramush Haradinaj janë zmbrapsur pothuajse në të njëjtën kohë nga qëndrimi që kishin kundër Gjykatës Speciale, duke deklaruar se ajo nuk mund të shfuqizohet. Mirëpo, deputetët që nënshkruan nismën thonë se ende kanë mendimin e njëjtë, tashmë të kundërt me shefat e tyre. Megjithatë, disa prej tyre besojnë se tentativa e tyre në mungesë të votave do të dështojë, shkruan Gazeta Express.
Ishte i pari kryeministri i vendit që deklaroi se ekzistimi i Gjykatës Speciale nuk do të vihet në pikëpyetje, sepse, sipas tij, ajo është krijuar me ndryshime kushtetuese dhe është votuar me shumicë parlamentare. Tjetri nga tre ideatorët për shfuqizim të Speciales, presidenti Thaçi, të enjten deklaroi se përfundimisht ajo nuk mund dhe nuk do të shfuqizohet.
“Gjykata Speciale nuk mund të shfuqizohet dhe nuk do të shfuqizohet. Ky është qëndrimi i shtetit”, deklaroi ai.
Tërheqje tjetër kishte bërë edhe Kryetari i kuvendit, Kadri Veseli, i cili theksonte se klasa politike nuk ka fuqi ta ndalojë shfuqizimin e saj. Mirëpo, ishin këta tre komandantë që u përfolën se kishin shtyrë deputetët drejt kësaj nisme. Në ditën kur nënshkrimet u mblodhën, pas një takimi të mbyllur për media, të parët e shtetit nuk thanë asgjë edhe pas paralajmërimeve të shumta nga ndërkombëtarët.
Por, përkundër tërheqjes së nismëtarëve të këtij procesi, deputetët që nënshkruan nismën vazhdojnë të mbrojnë qëndrimet e njëjta, tashmë të ndryshme me shefat e tyre. Deputetja e AAK’së Time Kadrijaj, në një deklaratë për Expressin, bëri të ditur se nuk tërhiqen nga qëndrimi i tyre. Ajo thotë se AAK është kundër, mirëpo, dyshon se iniciativa e tillë do të ketë sukses në Kuvend.
“Është procedura parlamentare që Kuvendi i Kosovës e ka dërguar si iniciativë ne Qeverinë e Kosovës dhe Qeveria e dërgon përmes dikasterit përkatës. Ne nuk jemi tërhequr, po në bazë të deklarimeve ju e dini që përmes votave të deputetëve po e shoh që LDK nuk do ta votojë, Vetëvendosja nuk do ta votojë”, thotë deputetja.
Deklaratat e Kryeministrit për Specialen ajo i komenton duke shtuar se kryeministri mban atë mendim, pasi që edhe ai e ka parë se ka mungesë të votave.
“Ne nuk kemi ndërruar qëndrim, ne jemi kundër se ne kemi votuar kundër. Por, për shkak të votave, se duke i parë deklarimet që po i bëjnë deputetët e caktuar për shkak të votave ndoshta edhe kryeministri ka thënë ashtu. Përndryshe ne si Aleancë nuk kemi ndërruar qëndrim se ne edhe kur është fuqizuar unanimisht kemi qenë kundër, jemi kundër dhe kjo ka qenë arsyeja pse i jemi përgjigjur kësaj nisme”, deklaroi Kadrijaj.
Ajo madje kritikon kolegët e saj deputetë për ndërrim të qëndrimeve.
“Ne nuk kemi qenë iniciues, ne vetëm kemi nënshkruar edhe si kemi qëndruar kemi qenë konform qëndrimeve tona, veprimeve tona të mërparshme, përkundër disa subjekteve politike që kanë qenë kundër, ndërsa tash po e përkrahin një nismë të tillë”, përfundoi Kadrijaj.
Ndërkaq, deputetë të PDK’së që nënshkruan iniciativën për shfuqizim nuk pranuan të deklarohen.
Ideja për shfuqizimin të Gjykatës Speciale bëri që ndërkombëtarët të alarmojnë politikanët kosovarë për pasojat që mund t’i sjellë shtetit.
