Lorik Cana i dha lamtumirën Kombëtares, por legjenda e futbollit shqiptar do të mbetet brenda FSGF-së. Ai është prezantuar sot si ambasador i “Grassroots” për vendin tonë. Ky projekt ka për synim masivizimin dhe zhvillimin e futbollit te moshat e reja.
Cana shprehet se projekte të tilla, janë mënyra më e mirë për të dhënë kontribut në zhvillimin e futbollit shqiptar.
“Është kënaqësi të jem i pranishëm ambientet e federatës. E konsideroj vetën pjesë të kësaj familjeje për të promovuar futbollin në vendin tonë. Duke qenë një njeri i lidhur me futbollin, është normale që dashuria për futbollin të vazhdojë me implementimin e projekteve, që e zhvillojnë këtë sport. Duke qenë njeri i sportit, dëshiroj të kontribuoj në zhvillimin e futbollit. Këto vitet e fundit, kemi mësuar se me punë dhe përpjekje mund të jemi të suksesshëm. Jemi një vend në zhvillim e sipër, edhe futbolli apo sporti në përgjithësi futet te kjo pjesë.
Kur kemi diskutuar për projektin e “Grassroots” jam bindur se mund t’i shtyj njerëzit të merren me sport. Është një program që nxit dëshirën dëshirën te fëmijët për të luajtur futboll, pse jo edhe të shkëlqejnë. Ne vendin tonë ka shumë gjëra të mira që mund të bëhen. Si ambasador i “Grassroots” shpresoj të ndikoj që fëmijët të rriten me frymën e sportit. Është një detyrë që kërkon projekte të mëdha, por mund të marrim rezulate shumë të mira në të ardhmen”, tha Cana gjatë konferencës për mediat.
Ndërsa kreu i Federatës Shqiptare të Futbollit Armando Duka tha se: “Është prioritet absolut për FSHF-në futbolli i fëmijëve, një projekt që do të vazhdojë. Sot duhet të mendojmë për të ardhmen dhe besoj se cdo fëmijë e ka ëndërr të bëhet i suksesshëm si Lorik Cana. E shfrytëzojmë këtë shembull pozitiv. FSHF do ta mbështesë Lorik në cdo hap që do të ndërmarrë”.
