Roland Lame, 47-vjeçari me origjinë shqiptare i konsideruar bosi i një rrjeri të trafikut ndërkombëtar të drogës, është arrestuar gjatë mbrëmjes së djeshme nga policia italiane.
Mediat e huaja shkruajnë se shqiptari i cili në një operacion të dy javëve më parë arriti t’i shpëtonte prangave të policisë, rreth orës 23:30 të mbrëmjes së të martës ka shkuar i plagosur me armë në spital. Një celulë kriminale në Barletta të Italisë u shkatërrua në kuadër të operacionit të koduar “Iliria”. Por Lame, i konsideruar si kreu i bandës, mundi të arratisej, por mbeti i plagosur, jashtë rrezikut për jetën.
Në operacionin e 30 majit policia vuri në pranga 8 persona (5 italianë dhe 3 shqiptarë) ndërsa u sekuestrua një sasi e madhe droge, 1.2 ton marijuanë, 20 kg substanca holluese të drogës, nga 1 kg kokainë e heroinë, 4.5 kg tritol, 1 kallashnikov, një sasi e konsiderueshme plumbash dhe disa detonatorë eksplozivi. Hetimet për këtë grup kriminal kishin nisur prej vitit 2013 ku u vunë në pranga 2 shqiptarë dhe u sekuestruan 100 kg marijuanë në Altamura, provincë e Barit. Vijimi i hetimit zbuloi edhe celulën kriminale italo-shqiptare me bazë në Barletta.
Sipas hetuesve në krye të organizatës ishte Roland Lame, i cili kishte fituar nënshtetësinë italiane dhe banonte në qytetin e Disfida. Shqiptari, së bashku me djalin e tij 25-vjeçar, Fabion, i cili ka rënë në prangat e policisë, mbanin kontakte me bashkëkombësit e tyre në Shqipëri për të organizuar dhe të për transportuar në Puglia të Italisë sasi të mëdha të marijuanës.
