Autoritetet spanjolle kanë sekuestruar një varkë që transportonte 2.1 ton kokainë. Varka u kap rreth 650 kilometra larg brigjeve të Galicisë, në veriperëndim të Spanjës.
Katër anëtarët e ekuipazhit janë arrestuar. Agjencia Spanjolle e Taksave dhe Doganave (AEAT) u shpreh se të arrestuarit janë nga Argjentina, Uruguai, Kolumbia dhe Shqipëria. Një anëtar tjetër i bandës u arrestua në Girona, pranë Barcelonës.
Anija 14 metra e gjatë, e cila valëviste flamurin polak, u tërhoq në portin e Vigos.
Anija kishte qenë nën mbikëqyrje që kur u nis në korrik nga porti i Roses, në bregdetin mesdhetar spanjoll pranë kufirit me Francën.
Autoriteti doganor tha se incidenti ka të ngjarë të jetë i lidhur me një organizatë kriminale që specializohet në trafikun e drogës duke përdorur anije me vela dhe që u ka ofruar shërbimet e saj organizatave në Evropën Lindore dhe në Ballkan.
Operacioni i suksesshëm i sekuestrimit përfshiu gjithashtu autoritetet doganore franceze, policinë polake dhe britanike, si dhe Agjencinë Amerikane të Zbatimit të Ligjit për Drogën (DEA).
AEAT e përshkroi operacionin si pjesë të luftës kundër trafikimit të drogës në të ashtuquajturën “rruga transatlantike e kokainës”. Kjo rrugë e veçantë njihet për përdorimin e anijeve me vela nga Amerika e Jugut, të cilat transportojnë drogën përtej Atlantikut, përpara se ta kontrabandojnë atë në Evropë sa më diskrete të jetë e mundur.
