E përditësuar 22:46 – Policia Kufitare ka goditur një tjetër tentativë për trafikim të lëndëve narkotike.
Shërbimet e Policisë Kufitare gjatë kontrollit të detajuar në vijën e dytë të shtetasit E.D. i kanë gjetur në trup një sasi lënde narkotike me peshë rreth 2 kilogramë e 160 gramë, e dyshuar si heroinë, e cila u sekuestrua në cilësinë e provës materiale.
Policia e Shtetit bën me dije se në vendngjarje ka mbërritur Grupi Hetimor, Specialistë të Njësisë Hetimore Qendrore në Departamentin e Policisë Kriminale dhe Specialistët për Hetimin e Narkotikëve në Drejtorinë Vendore të Policisë Durrës ku vijon puna për zbardhjen e plotë të kësaj ngjarje.
Materialet do t’i kalojnë Prokurorisë për Krime të Rënda Tiranë për veprime të mëtejshme.
***
Zbardhen të tjera detaje nga sekuestrimi i një sasie heroine dhe kokaine në portin e Durrësit. Pas ngjarjes mësohet të jenë arrestuar shoferi i kamionit dhe shoqëruar 2 persona të tjerë.
Mësohet se njëri nga shoferët e kamionit të ndalua e ka lidhur me ngjitës drogën në trup dhe raportohet është e llojit të fortë. Është arrestuar drejtuesi i kamionit, emri i të cilit nuk bëhet i ditur dhe as se çfarë transportonte kamioni. Janë shoqëruar edhe dy persona të tjerë.
Policia ka pasur indicie që ky person mund të merrej me trafik ndërkombëtar të lëndëve narkotike e kanë mbajtur nën mbikëqyrje dhe sot para se të imbarkohej i kanë bërë kontroll të imtësishëm dhe poshtë rrobave të trupi i kanë gjetur drogën.
Policia po bën kontrolle dhe në banesën e tij dhe personave që dyshohet se kanë lidhje me shoferin e kamionit dhe trafikun e drogës.
/a.r
