Autoritetet italiane kanë sekuestruar 216 kilogramë khat, një bimë me përbërës psikoaktivë e klasifikuar si lëndë narkotike, në aeroportin ndërkombëtar të Fiumicinos në Romë.
Droga u zbulua në shtatë valixhe të një pasagjeri me shtetësi izraelite, i cili mbërriti me një fluturim nga Tel Avivi.
Kontrolli u krye nga efektivët e Gardës Financiare dhe zyrtarët e Agjencisë së Doganave, pasi pasagjeri dha përgjigje të paqarta dhe kontradiktore lidhur me arsyen e udhëtimit dhe detajet e qëndrimit të tij në Itali.
Gjatë kontrollit me skaner dhe hapjes së valixheve, autoritetet gjetën një sasi të madhe khat (Catha edulis), e përbërë nga tufa me gjethe dhe filiza të freskët. E gjithë sasia u sekuestrua nga policia.
Khat është një bimë që përmban substancat psikoaktive katinon dhe katinë. Katinoni njihet shpesh si një “amfetaminë natyrale”, pasi ka efekte stimuluese të ngjashme me ato të amfetaminës ose kokainës, megjithëse me intensitet më të ulët.
Meqenëse pasagjeri ishte i vetmi person i regjistruar si pronar i shtatë valixheve, ai u procedua në gjendje të lirë në Prokurorinë e Civitavecchias për veprat që lidhen me trafikun e lëndëve narkotike.
