Xhenaro Gatuzo nuk është më në krye të stolit të Pizës. Trajneri ka dhënë dorëheqjen bashkë me stafin e tij duke bërë përgjegjes drejtuesit e klubit për mënyrën e menaxhimit, apo mungesën e një vizioni të qartë për ekipin që u ngjit nga Lega Pro në Serinë B.
Fillimisht mediat italiane raportuan mesditën e së dielës largimin e tij nga Piza dhe pak kohë më pas, tekniku sqaroi në një deklaratë për mediat arsyet e largimit.
“Pa organizim dhe pa programim nuk është e mundur arritja e një objektivi serioz, konkret dhe realist. Gjendja aktuale e klubit nuk ofron asnjë perspektivë”,-thuhet në deklaratë.
Ujkani
Te modestët e Pizës luajnë edhe dy futbollistë shqiptar si portieri Sajmir Ujkani dhe sulmuesi Edgar Cani. Ky i fundit ka qenë disa herë protagonist me golat e tij në sezonin e kaluar, ndërsa Ujkani kaloi te Piza pak javë më parë. Largimi i Gatuzos duket se ngre pikëpyetje edhe për të ardhmen e dy shqiptarëve që aktivizohen në këtë ekip./panorama/a.k
