Seanca e sotme plenare u zhvillua me tensione dhe kaos, e “shkaktare” u bë Diella, ministrja më e re me AL e kabinetit të Edi Ramës.
Deputetët demokratë ngritën zërin, bllokuan foltoren, dhe “fluturuan” fletoren e Kuvendit në ajër me shënjestër kryeministrin Edi Rama, kryetarin e Kuvendit dhe kabinetin e tij qeveritar.
Pjesë e kësaj seance ishin dhe përfaqësuesit e trupës diplomatike të cilët me plot kuptimin e fjalës vendosën “duart mbi kokë”. Nga fotot e kapura në sallë ata shihen të habitur duke parë situatën e krijuar në sallë.
Lidhur me këtë reagim të ndërkombëtarëve ka reaguar edhe Agron Duka, i cili duke theksuar edhe njëherë qëndrimin e opozitës se Shqipëria nuk qeveriset me avatarë, ai është ndalur edhe te momenti kur diplomatët e huaj mbetën të shtangur.
“Momenti kur diplomatët e huaj mbetën të shtangur nga ajo çfarë ndodhi në sallën e Kuvendit është tregues i turpit institucional që po i ofrohet opinionit ndërkombëtar. Shqipëria nuk ofroi vizion europian, por imazh të një demokracie të deformuar”, shkruan ai.
Reagimi i plotë:
Nga Kuvendi në spektakël turpi Shqipëria nuk qeveriset me avatarë
Sot në Kuvend u shkel çdo parim i demokracisë parlamentare. Mazhoranca përdori arrogancën e numrave për të mbytur fjalën e opozitës dhe për të shndërruar seancën më të rëndësishme të vitit në një shfaqje propagandistike. Ky akt është dëshmi e qartë e një qeverisjeje që i trembet llogaridhënies dhe zgjedh rrugën e manipulimit politik.
Momenti kur diplomatët e huaj mbetën të shtangur nga ajo çfarë ndodhi në sallën e Kuvendit është tregues i turpit institucional që po i ofrohet opinionit ndërkombëtar. Shqipëria nuk ofroi vizion europian, por imazh të një demokracie të deformuar.
PAA paralajmëron se dhunimi i Kushtetutës dhe Rregullores së Kuvendit nuk është thjesht abuzim politik, por rrugë e rrezikshme drejt autoritarizmit. Shqiptarët nuk kanë nevojë për “avatarë” virtualë, por për politika reale që zgjidhin hallet e tyre në ekonomi, bujqësi, arsim dhe shëndetësi.
Partia Agrare Ambientaliste do të qëndrojë në çdo rast në krah të qytetarëve, duke mos lejuar që Parlamenti të kthehet në teatër propagande dhe që demokracia shqiptare të rrënohet nga abuzimi me pushtetin.
