Anëtari i kryesisë së PD, Eno Bozdo është shprehur kritik dhe i ashpër në lidhje me vendimin e komisionit të përhershëm statutor, të marrë gjatë mbledhjes së sotme.
Kujtojmë se Komisioni në fjalë vendosi të kalojë vetëm propozimet e kreut të PD Lulzim Basha për ndryshime në Statut.
“Ishin paraqitur 4 propozime që praktikisht binin në dy blloqe. Në një bllok që trajton statutin aktual dhe përmirëson rregulla të vogla, procedura dhe në një bllok tjetër, ku hynte propozimi i z. Fatbardh Kadilli dhe një rikonceptim të plotë të jetës politike të PD.
Komisioni me shumicë votash mendoi t’i përcillte kryesisë nesër vetëm draftin e Bashës, por qëndrimi im është që të gjitha propozimet politike që kanë të bëjnë me rikonceptimin e rolit të organeve të vecanta të partisë apo diskutimi për çështje të nxehta, mendoj që duhet të jenë të gjitha të trajtimit politik dhe vendimmarrjes së kryesisë së partisë, pra s’mund të merrte komisioni një vendim të tillë”, ka thënë Bozdo.
Ky i fundit thotë më tej se është i qartë se për çfarë ka nevojë PD po ndërkohë, çdo propozim politik, sipas tij duhet t’i kalojë kryesisë./m.j
