Rreth 150 mijë persona morën pjesë në marshimin e organizuar nga aktivisti i ekstremit të djathtë, Tommy Robinson, në Londër të Britanisë së Madhe,
Siç shkruan SkyNews, Ministrja e Brendshme, Shabana Mahmood është zotuar se çdo person që rezulton të ketë marrë pjesë në aktivitet kriminal do të “përballet me të gjithë fuqinë e ligjit”, ndërsa policia njoftoi se të paktën 25 persona u arrestuan dhe 26 oficerë u plagosën, përfshirë katër që u lënduan seriozisht.
Protestuesit që morën pjesë në marshimin “Unite the Kingdom” u mblodhën në qendër të kryeqytetit. Ata dëgjuan një seri fjalimesh, përfshirë atë të Robinson, i cili e quajti ngjarjen “protesta më e madhe për lirinë e fjalës në historinë britanike”.
U zhvillua edhe një protestë kundër racizmit, me rreth 5 mijë pjesëmarrës, gjë që shkaktoi përplasje mes grupeve në Whitehall dhe Sheshin Trafalgar e po ashtu me policinë. Personat e arrestuar akuzohen për një gamë të gjerë veprash penale, përfshirë përleshje, sjellje të dhunshme, sulme dhe shkatërrim prone.
Thirrje kundër emigrantëve
Nëpër rrugët e Londrës, u panë flamuj anglezë, huliganë dhe shumë punëtorë të klasës punëtore që kanë humbur besimin te laburistët.
Pjesëmarrësit brohorisnin për Robinson dhe për influencuesin amerikan Charlie Kirk, që u vra së fundmi.
Disa mbanin bluza me mbishkrime kundër emigrantëve si “Stop deportimit”. Në pankarta kishin shkruar pyetje të tipit: Pse të bardhët përbuzen, edhe pse paguajnë më shumë taksa?! Sloganet e marshimit përfshinin gjithashtu: Flisni anglisht në call center!
Robinson ndezi turmën, e cila u ngjit kudo: mbi luanët e Sheshit Trafalgar, mbi ndërtesat qeveritare në Whitehall apo mbi stacionet e autobusëve në Westminster.
Ai deklaroi se gjykatat ende po favorizojnë emigrantët, ndryshe nga komuniteti i tyre.
Mesazhi ekstrem i Musk
Ngjarja u shoqërua me një ndërhyrje surprizë me video nga Elon Musk, i cili kohët e fundit ka mbështetur idetë e ekstremit të djathtë në Perëndim:
Duhet të largoni qeverinë e Starmer. Nuk mund të prisni 4 vjet të tjera për zgjedhjet, përndryshe dëmet do të jenë të pakthyeshme. Parlamenti duhet të shpërndahet! BBC është bashkëfajtore në shkatërrimin e Britanisë! Ose rebeloheni, ose do të vdisni!
