Kanuni, historia e përplasjes së dy familjeve që shkakoi 22 të vdekur
Dy të pandehur janë dërguar para Gjykatës Penale të Broye për vrasjen në maj 2013 me 15 plumba të një kosovari në prani të familjes së tij.
Hetimet për vrasjen në Frasses të Zvicrës tashmë janë mbyllur duke vënë në dukje se vrasja kishte ndodhur gjatë një konflikti në mes dy familjeve kosovare, të cilat dyshohen se i kanë vrarë njeri-tjetrit 12 persona në 14 vite.
Këtë e ka bërë të ditur Prokurori i Përgjithshëm i Friburgut përmes një deklarate ku theksoi se “Gjakmarrja çoi në vdekjen e të paktën 12 njerëzve nga të dy klanet mes viteve 2000 dhe 2014, pa i përmendur vdekjen e një duzine të të afërmve të tyre.”
Duke pasur parasysh heshtjen e të pandehurve, prokurori megjithatë ka mbajtur një hipotezë të dytë. Vrasja mund të jetë kryer nga dy persona të tjerë, të cilët janë ende të panjohur.
Në këtë rast të pandehurit kanë qenë vetëm bashkëveprues, duke i furnizuar me armë dhe duke i ndihmuar vrasësit për të ikur.
Të dy të pandehurit tani janë në Gjykatën Penale për vrasjen e kryer në komunën Broye dhe janë të akuzuar për vënie në rrezik të jetës së të tjerëve, si dhe në pjesëmarrje/bashkëpunim në vrasje. Të dy burrat në fjalë gjenden në paraburgim që nga muaji gusht, respektivisht dhjetor 2013.
