Një operacion i policisë së Krujës i koduar “Brreti” ka vënë në pranga dy persona të dyshuar për vjedhjen me armë të një banese.
Shërbimet e Komisariatit të Policisë Krujë, pas marrjes së njoftimit për një rast vjedhjeje, në fshatin Brret, kanë organizuar punën për identifikimin dhe kapjen e autorëve.
Si rezultat i veprimeve të shpejta hetimore dhe policore, në kuadër të operacionit policor të koduar “Brreti”, u bë identifikimi, kapja dhe arrestimi i shtetasve K. G., 38 vjeç dhe Xh. G., 22 vjeç, të dy banues në Laç.
Dy të ndaluarit, në bashkëpunim me njëri-tjetrin, duke kanosur me arme zjarri, pushkë gjysmë-automatike, kanë vjedhur në Brret, Krujë, në banesën e një 40-vjeçari.
Gjatë këtij operacioni, shërbimet e policisë gjetën dhe sekuestruan në cilësinë e provës materiale, armën e zjarrit, municion luftarak dhe sendet e vjedhura në banesën e 40-vjeçarit.
Në bashkëpunim të ngushtë me Prokurorinë pranë Gjykatës së Rrethit Gjyqësor Krujë, vijon puna për zbardhjen e rasteve të tjera të vjedhjeve që dyshohet se janë kryer nga këta 2 shtetas.
Ndërkohë materialet i kaluan Prokurorisë Krujë, për veprime të mëtejshme, për veprën penale “Vjedhje me armë”, kryer në bashkëpunim.
/a.r
