Nga Ben Andoni
Që abuzimet në Shqipëri janë galoponte këtë e tregon sjellja e publikut në dëgjesat, por njëkohësisht zyrtarisht edhe raporti i Kontrollit të Lartë të Shtetit, që ka gjetur 2 miliardë euro abuzime, vetëm në katër vitet e fundit. Por interesant është në këtë drejtim edhe Inspektoriati i Lartë i Deklarimit dhe Kontrollit të Pasurive, që po në vitet e fundit ka gjetur shkelje deri në 50 miliardë Lekë, fshehje parash nga zyrtarë të ndryshëm.
Po pse nuk dënohet askush? Kjo është pyetja që rëndon mbi publikun dhe që drejtohet vazhdimisht. Duke bërë një retrospektivë të vogël, që prej vitit 2013, kur Partia Socialiste ka mandatin e drejtimit të vendit, që e ka cikluar sërish më 2017, gjenden me dhjetëra akuza dhe kallëzime penale për zyrtarë. Ato janë nga të dy anët e politikës. Kemi emrat e Milva Ekonomit, Ridvan Bodes, Sherefedin Shehut, Arben Imamit e kështu shumë me radhë.
Ngritja e SPAK-ut, Struktura e Posaçme Antikorrupsion, jepte idenë se ajo do të hetonte pa hezitim. Por, kjo duket se nuk është bërë prej vonesave të gjykimeve. Që më 1 Gusht ka hyrë në fuqi Kodi i Procedurës Penale, që e detyron Prokurorinë e Përgjithshme të zhvendosë drejt saj dosjet që janë në hetim. Paradoksi është se në ligj thuhet se dosjet që janë mbyllur nuk mund ta hapen përveç kërkesave të rralla.
Në vetë raportin e Prokurorisë të vitit 2016 është thënë se dosjet janë mbyllur. Kështu kryetari i opozitës Basha nuk rezulton më i penalizuar,ashtu si disa personazhe të pozitës së sotme. Me pak fjalë në raportin e vitit 2016 thuhet se në fund të këtij viti, pati vetëm një rast në hetim, kurse të gjitha rastet e tjera janë pushuar.
Po për vitin 2017? Janë vetëm tre dosje në shqyrtim, ku e para lidhet me padinë e Komisionit parlamentar për aferën e OSSH, ku është paditur Sali Berisha. Një tjetër rast është ai që lidhet me deputetin Tom Doshi dhe qëndron ende edhe dosja e ish-deputetit Alfred Peza.
Paçka frymës që ekziston, kundravajtësit VIP nuk duhet të flenë ende të qetë sepse dosjet e mbyllura mund të merren në shqyrtim, kur prokurorët kanë relacione se mund të ketë vepra penale në këto dosje. (JavaNews)
