Mediat kanë publikuar një kopje të procesverbalit të BKH-së, gjatë kontrollit të banesës së Erion Veliajt ku evidentohet se në dollapin e bashkëshortes së kryetarit të bashkisë Ajola Xoxa janë gjetur veshje kryesisht ‘Zara’, një firmë shumë ekonomike.
Në dosjen hetimore Prokuroria e Posaçme thotë se bashkëshortja e kryetarit të bashkisë së Tiranës, Ajola Xoxa në 6 vite ka blerë online mbi 860 mijë euro veshje dhe bizhuteri, shpenzime të cilat nuk i ka deklaruar.
Dokumenti i siguruar nga Shqiptarja.com hedh dyshime mbi akuzat të cilët pretendojnë se online janë blerë veshje firmato nga bashkëshortja e kryebashkiakut Veliaj per perdorim personale:
Në këtë dhomë, përballë me dollapët metalikë, gjendet dollapë material druri në brendësi të së cilës gjendet rroba kryesisht të markës Zara, këpucë femrash, shkruhet në procesverbalin e agjentëve të BKH-së gjatë kontrollit që kanë bërë që ka siguruar Shqiptarja.com
Në fakt, në asnjë bastisje në banesën dhe në ambientet e frekuentuara nga Ajola Xoxe nuk janë gjetur rroba firmato apo objekte të tjera me vlerë të madhe, siç pretendon SPAK.
Ndërkohë Kryebashkiaku Veliaj gjatë dëshmisë së tij në gjyq në seancën për vlerësimin e masës së sigurisë, mbajtur më 14 shkurt, tha se blerjet online janë veshje për aktorë e këngëtarë për të përdorur për videoklipe. Kryebashkiaku akuzon prokurorin Ols Dado se është nxitur nga motive personale, pasi i është mohuar një leje ndërtimi nga Bashkia e Tiranës.
Ka shkruar në akt-akuzën haluçinante se ime shoqe ka harxhuar mbi gjysëm milionë euro për blerje online fustanësh dhe bizhuterish. Ky pervers, që më pyeste mua për fustanet e gruas dhe më tregonte gjatë marrjes në pyetje se si shkonte kontrollonte gruan e tij në punë, nuk ka dashur t’ia dijë për shpjegimet e mia dhe të sime shoqeje. Blerjet online janë të gjitha të deklaruara dhe në një shumë disa herë më të vogël, janë bërë për shfaqjet artistike të fondacionit kulturor të sime shoqeje. Faturimi i asaj shume në një akt-akuzë, si një lumë parash i derdhur për luks, është një perversitet kriminal.
Fakt i konfimuar dhe nga dokumenti i agjentëve të BKH-së të cilët kanë konstatuar se gjatë kontrollit që është bërë në banesën e Ajola Xoxës nuk janë gjetur veshje luksi.
Dyqanin e nuses së Saliut
Edhe në reagimin e sotëm Kryebashkiaku Veliaj hodhi edhe njëherë poshtë akuzat që SPAK ka ngritur ndaj tij. Duke qëndruar tek Berisha, komentuesve për blerjet online nga Ajola Xoxa të fustaneve që ai thotë se janë për shfaqje arti të OJF-ve të saj.
Unë i mirëkuptoj të gjithë ata që neveriten kur shikojnë se si dalin nga gjirizet mediatike fustanët e sime shoqeje. Por, a ma thotë dot kush, ku është maunia me gati 1 milion Euro mall?
Se për 1 milion Euro mall duhet një dyqan si ai i brekëve dhe sutjenave të nuses së Sali fundërrinës në Bllok apo jo? Përderisa edhe lavamanët i shkulën nga vendi në gjithë ambientet në Tiranë e në Golem, për të kërkuar ndonjë varëse floriri të fshehur, në mure e dysheme, ku dihet botërisht se jetojmë në pallat të ndërtuar në vitin 2012 (kam hyrë në atë apartament kohë më parë se sa të bëhesha kryetar bashkie, leje e Komunës Farkë e Bardh Plakut, as e dhënë nga unë vetë), atëherë duhet t’i kishin provat materiale besoj, apo jo? Kanë blerjet online do thoni ju.
Por, ja që e vërteta nuk është ashtu si thotë prokurori i fiksuar pas fustanëve të gruas time, që gjatë intervistës më tregonte se si kontrollonte gruan e tij dhe më pyeti edhe “çfarë hamë?”.
Po po, e lexuat mirë, çfarë hani ju tha! Pa merak, se do ju’a tregoj edhe këtë, këtu jemi! U pa puna, ata me letra anonime dhe metoda sigurimse, unë me letra nga burgu, ku më morën peng pa gjyq”-shkruan Veliaj.
