Drejtorja e teatrit “Migjeni” në Shkodër, Rita Gjeka, premton që shfaqja e parë që do të vihet në skenën e teatrit, pas përfundimit të punimeve, do të jetë drama “Kandili i Argjendit”.
Kjo ishte shfaqja e fundit që u vendos në teatrin ‘Migjeni’ para nisjes së punimeve dhe do të jetë e para pas rikonstruksionit. Do të jetë data 2 Prill, kur do të shfaqet kjo dramë, ndërsa aktorët e kësaj drame kanë nisur provat.
Duke folur për shfaqjen, Drejtorja e teatrit por edhe njëra prej kasës së aktorëve Rita Gjeka, tha se data 2 Prill përkon me ngjarjet që ndodhin në këtë dramë. Drama “Kandili i Argjendit” i përket autorit Martin Camaj, ndërsa në skenë është vendosur nga i ndjeri Fatbardh Smaja.
Regjisori Smaja u nda nga jeta në 7 nëntor 2015 në Shkodër, gjatë kohës që punonte për vënien në skenë të kësaj vepre.
Kjo dramë u shfaq edhe për publikun kryeqytetas në datat 5 dhe 6 dhjetor nga trupa e teatrit “Migjeni” në Teatrin Eksperimental “Kujtim Spahivogli”.
Martin Camaj, shkrimtari, poeti dhe albanologu i lindur në Temal të Dukagjinit në vitin 1925, ka gjithsej dy drama “Lojë mbasdreke” dhe “Kandili i argjendtë”, të botuar në vitin 1995.
Drama u shkruat rreth viteve ’50 ku ngjarjet vendosen në Shkodër dhe janë disa personazhe, të cilët mendohet se bëjnë pjesë tek armiqtë e kohës së luftës, dhe për këtë arsye sigurimi shpik që pranë shtëpisë së tyre do të kalonte rruga. Në fakt, ata dyshojnë se aty kishte ar.
Por e gjithë pasuria e tyre është një kandil argjendi dhe asgjë tjetër, ndërsa ata kërkonin prej tij të rrëmonin pikërisht këtë aspekt.
