Ditën e parë si kandidati zyrtar i mazhorancës për Bashkinë e Dibrës, Muharem Rama e ka nisur me një përshëndetje spontane me qytetarët dhe mbështetësit në rrugët e Peshkopisë dhe Maqellarës.
Në këtë dalje të parë publike, Rama shoqërohej nga kordinatori i Kryesisë së Partisë Socialiste për Qarkun e Dibrës, ministri i Energjisë dhe Industrisë, Damian Gjiknuri.
“Ndryshe nga forca tjetër politike, ne nuk duam të sjellim figura të ricikluara politike që e thonë vet se janë afër pensionit por na kërkon partia për interesat e saj. Ne duam që qytetarëve të Dibrës tu japim njeriun që meritojnë, tu japim djalin e tyre dhe njeriun që i ka shërbyer popullit. Unë them se qytetarët e Dibrës, më shumë se sa një politikan që vjen thjesht për interesa politike, kërkojnë një njeri që jua di hallet, ka jetuar me hallet e tyre e që do vazhdojë të jetojë në këtë qytet”, u shpreh z.Gjiknuri.
Sipas tij, me Muharem Ramën kryebashkiak, Dibra do të ketë mbështetjen e qeverisë shqiptare për të çuar përpara e bërë realitet investimet që kanë nisur e që do të vazhdojnë.
“Kjo do të jetë fushata e qytetarëve, qytetarët le të vendosin: kanë këtu djalin e tyre që i ka shërbyer popullit; kanë dhe njerëz që kanë ikur, kanë bërë punët e tyre në Tiranë dhe tani vijnë tu kërkojnë votat për të ju gënjyer siç ju kanë gënjyer tash e 20 vjet”, tha Gjiknuri.
