Nënkryetarja e Partisë së Lirisë Erisa Xhixho, e ftuar në Programin e drekës në News 24 tha se Partia e Lirisë është në luftë përditë me regjimin e Ramës.
Xhixho theksoi se Partia e Lirisë po bën negociata me PD-në për të qenë në një koalicion. Sipas saj, kreu i Partisë së Lirisë Ilir Meta është në burg për efekt elektoral.
Erisa Xhixho: PD dhe PL janë dy forcat politike opozitare kryesore. Jemi në proces negociatash me Partinë Demokratike për koalicionin. Ne kemi ngarkuar z Tedi Blushi për të hyrë në negociata. Jemi në negociata për mënyrën sesi do të hyhet në zgjedhje për koalicionin elektoral. Për ne është e rëndësishme që PL të jetë përditë në përballje me këtë regjim.
Ne sot do jemi në shesh, do jemi bashkë, sepse jemi kundër këtij regjimi dhe për fitore bindëse të opozitës. PL është goditur tek lidershipi i saj, në një arrestim banditesk në shkelje të Kushtetutës dhe në një vit elektoral, ku Ilir Meta mund të hetohej në gjendje të lirë dhe nuk kishte pse të ishte në burg. Meta në burg është për efekt elektoral.
