Anëtari i Këshillit Kombëtar të Partisë Demokratike, Ilir Alimehmeti, është shprehur se PD ende nuk ka një emër me të cilin do të garojë në zgjedhjet lokale të vitit të ardhshëm në Bashkinë e Tiranës.
Komentet Alimehmeti i bëri në studion e emisionit ‘Studio Live’ me gazetarin Ermal Qori në Report Tv, ku teksa u pyet për Florian Binajn, tha se opozita nuk do të shkojë në zgjedhjet lokale me kandidat të pavarur.
Sipas Alimehmetit, Binaj mund të garonte për Bashkinë e Tiranës vetëm nëse gjatë kësaj kohe do të përfshihej në strukturat e një subjekti politik opozitar.
“PD është në proces ristrukturimi. Zoti Binaj dha një kontribut shumë të çmuar. Ofroi figurën e vet për opozitën, integritetin e tij në një moment të vështirë për opozitën dhe për PD-në. Megjithatë në zgjedhjet e vitit 2027 nuk do shkohet me kandidatë të pavarur. Pra jemi duke folur për tipologjinë e kandidatëve. Në këtë drejtim nuk kemi dalë me emra të përvetshëm. Por nuk është çudi që Binaj të ketë edhe një trajektore brenda-partiake”, tha mes të tjerash Alimehmeti.
Ndërkohë nga ana tjetër, kryetari i Partisë Agrare Ambientaliste, Agron Duka, është shprehur se është një lajm pozitiv nëse Erion Braçe do të kandidonte për kryetar të Bashkisë së Tiranës.
Duka tha se Braçe është një figurë që ka pëlqyeshmëri të lartë te të majtët në Shqipëri dhe se ka ndërmarrë nisma në interes të qytetarëve. Ai shtoi gjithashtu se besonte se pavarësisht dëshirës së Braçes, kryeministri Edi Rama nuk do ta pranonte kandidimin e tij në emër të PS-së për Bashkinë e Tiranës.
“Si e shikoni vetëofrimin e Braçes për kandidat për Bashkinë e Tiranës?”- e pyeti gazetari Dukën.
“Braçe është person pozitiv që gëzon simpati te të majtët, edhe më tej, për shkak të angazhimeve të veta personale dhe për shkak të kësaj problematike që ka mazhoranca. Sepse mazhoranca duke qenë e zhytur në korrupsion, populli e di shumë mirë se herë pas here kanë dalë në pah njerëz shumë të rëndësishëm që janë kapur gafil me vepra korruptive. Ndërkohë një njeri, që nuk ka qenë asnjëherë në asnjë lloj detyre, por ka dhënë kontribute të jashtëzakonshme te PS, ngre gjithmonë probleme pro qytetarëve dhe zonave rurale, kjo do ishte pozitive për medimin tim. Sa më dëgjojnë mua? Bën vaki që mos të më dëgjojnë fare. Kjo mund të ndikojë edhe negativisht. Sepse të lavdëroj një njeri i opozitës një njeri të mazhorancës, nuk e di sesa pikë… Kështu që unë nuk besoj, pavarësisht se Braçe ka shprehur dëshirën, do të jetë ai kandidati për Tiranën. Rama e ka zgjedhur kandidatin për Tiranën. Kjo puna e Braçes nuk besoj se do ketë ndonjë të ardhme”, tha mes të tjerash Duka.
Më tej Alimehmeti foli edhe për një kandidim të mundshëm për kryetar të Bashkisë së Tiranës në emër të Partisë Demokratike. Alimehmeti nuk e mohoi kandidimin, por tha se vendimi do të merren nga Kryesia dhe forumet e tjera të Partisë Demokratike.
“A do ta konsideronit një kandidim të mundshëm për kryeqytetin?”, e pyeti gazetari-Alimehmetin.
“Është Kryesia e PD-së që do mblidhet, do e diskutojë. Ju e dini që në atë trajektore unë jam futur në vitin 2022. Kështu që ata janë të qartë mbi realitetin. Do ta diskutojnë dhe vendosin forumet drejtuese. Jemi shumë paraprake për të folur sot pas një viti që janë zgjedhjet. Edhe këto diskutime i shoh paraprake në këtë drejtim”, shtoi Alimehmeti.
