Ministrja e Shëndetësisë Ogerta Manastarliu deklaroi se muaji tetor është shume i rëndësishëm për të ”rritur ndërgjegjësimin e grave që ato të ekzaminohen duke parandaluar në kohë këtë sëmundje e cila nëse diagnostikohet hershëm patjetër që shpëton jetë”.
”Sot ka mundësi që kanceri i gjirit të parandalohet falë edhe investimeve që ka bërë qeveria, jo vetëm në QSUT, por edhe në spitalet rajonale, në burime njerëzore por dhe në pajisje të teknologjisë së lartë. Në 5 spitale rajonale janë vendosur 5 mamografi të reja. Janë investuar rreth 800 mijë euro vetëm për instalimin e këtyre mamografive, në Durrës në Vlorë, në Gjirokastër në Kukës dhe në Dibër”, tha ajo.
Manstarliu sqaroi se janë vendosur edhe 2 mamografi lëvizëse për të plotësuar nevojat edhe larg qyteteve të mëdha.
Ministrja informoi se është zgjatur edhe orari për ekzaminimin e grave deri në orën 6 e po punohet edhe të shtunave.
Manastarliu deklaroi se në Qendrën Spitalore Universitare të Tiranës aktualisht nuk mungojnë barnat që nevojiten për kurimin e kancerit të gjirit. Ministrja sqaroi se përpara një viti kishte mungesë të herceptinës por qeveria shqiptare u përkushtua që këto barna të mos mungojnë.
Ogerta Manstirliu tha se të premten hapet edhe kabineti i kemioterapisë në Fier.
/b.d
