Angela Merkel ka përfunduar në karantinë pasi ka takuar një mjek, i cili ka qenë i infektuar me Covid 19.
Këtë lajm e ka bërë zyrtar, zëdhënësi i kancelares për agjencinë shtetërore të lajmeve të Gjermanisë DPA.
“Mjeku i cili i ka dhënë kancelares të premten një vaksinë kundër pneumokokeve, është diagnostifikuar sot pozitiv në virusin Corona”, bëri të ditur zëdhënësi Steffen Seibert.
Kancelarja Merkel ka bërë menjëherë një test. Por Seibert tha se testimet do të vazhdojnë edhe ditët në vijim, sepse vetëm një test nuk mjafton.
Gjermania forcoi kufizimet e ndërveprimit shoqëror, duke ndaluar takimet publike të më shumë se dy personave, për të ngadalësuar përhapjen e koronavirusit.
“Qëllimi është të fitosh kohë në luftën kundër virusit“, tha kancelarja gjermane, Angela Merkel, në një konferencë për shtyp.
“Të paktën për dy javët e ardhshme, njerëzit nuk do të lejohen të formojnë grupe me më shumë se dy persona në publik, përveç nëse ata jetojnë së bashku në të njëjtën familje ose tubimi është i lidhur me punën”, shtoi ajo.
Si pjesë e një sërë rregullash më të rrepta, Gjermania vendosi që restorantet mund të ofrojnë vetëm shërbime për marrje të ushqimit me vete, ndërkaq bizneset e parukierëve, masazheve dhe ato të tatuazheve duhet të mbyllen.
