Parlamenti kanadez ka përshendetur komunitetin shqiptar me rastin e ditës së Flamurit. Deputetja, Julie Dabrusin, ka mbajtur një fjalim në parlament për nder të 28 Nëntorit.Në fjalën e saj, Dabrusin ka përshkruar historinë e kësaj dite për shqiptarët dhe në fund ka uruar në gjuhën shqipe.
“Sot është Dita e Pavarësisë së Shqipërisë. Pas pesë shekujsh nën pushtimin e Perandorisë Osmane, Shqipëria shpallë pavarësinë më 28 nëntor 1912. Në këtë ditë, shqiptarët ngritën flamurin në Vlorë, ditë e cila prej atëherë njihet si ‘Dita e Flamurit’Në këte dite te shenuar deshiroj te përshendes gjithe shqiptaret ne vendin tone dhe gjithe shoqatat qe ata kane formuar. Gëzuar Festën e Pavarësisë.”- tha Julie Dabrusin, deputete e parlamentit kanadez.
Festa e Pavarësisë ka zbritur edhe në Bashkinë e New Yorkut. Në hollin e Bashkisë kumbuan tingujt e himnit shqiptar, që hapën mbrëmjen festive, të organizuar nga Këshilli Bashkiak që ka në përbërje edhe shqiptarë.Gjatë ceremonisë u nderuan me certifikata gjashtë shqiptaro-amerikanë. Në një gjest simbolik për të reflektuar unitetin kombëtar, personalitetet ishin zgjedhur për të përfaqësuar të gjitha trojet shqiptare. Disa të rinj të veshur me kostume popullore performuan valle shqiptare në praninë e 200 të ftuarëve.
Një sallë e mbushur me plisa dhe të rinj të veshur me kostume popullore dëshmuan se komuniteti shqiptar megjithëse ka hedhur rrënjë prej një shekulli në Nju Jork, ruan ende identitetin kombëtar. (BW)
