Presidenti Bujar Nishani ka zyrtarizuar mbledhjen e Këshillit Kombëtar të Sigurisë në datë 11 nëntor në orën 18:00 për çështjen e kanabisit.
Anëtarë të Këshillit të Sigurisë Kombëtare janë Kryeministri, Ministri i Brendshëm, i Jashtëm, i Mbrojtjes, i Financave, i Transporteve, kreu i SHISH, Kryeprokurori dhe Drejtori i Përgjithshëm i Policisë.
Presidenti Nishani deklaroi të martën se do të mblidhte Këshillin Kombëtar të Sigurisë, ndërsa sot ka zyrtarizuar datën dhe orën e takimit.
Nishani e konsideroi dje çështjen e kanabisit si një problem serioz për vendin.
“Kanabisi është një shqetësim serioz. Do thërras Këshillin e Sigurisë Kombëtare për këtë çështje që ka marrë përmasa të mëdha”, u shpreh Nishani dje nga Shkodra.
Sipas tij, “shërbimet inteligjente ndërkombëtare janë shqetësuar për këtë fenomen”.
Por deklarata e Presidentit u kundërshtua nga Kryeministri Edi Rama, i cili iu përgjigj “Jo” mbledhjes së Këshillit të Sigurisë Kombëtare.
Rama u shpreh dje në Facebook duke ironizuar se, “duhet të mblidhet Këshilli Kombëtar i PD-së dhe redaksitë e gazetave e të portaleve të SHQUP-it”.
Kryeministri publikoi dhe letrën e Komisionerit Europian për Punët e Brendshme, i cili vlerësonte punën e Ministrit Tahiri për punën e bërë në luftën ndaj kanabisit./repor tv/a.k
