Shqipëria jo vetëm vend “pritës” i kanabisit laboratorik që trafikohet përmes postës, por edhe tranzit për ta futur në Europë.
Kjo rrugë e trafikut të drogës është evidentuar së fundmi nga Policia e Shtetit, gjatë hetimit të dhjetra rasteve të sekuestrimit të kanabisit me postë, apo me valixhe dore që kanë mbërritur në vendin tonë.
“Kemi evidentuar se shumë dërgesa kryesisht nga Amerika të kanabisit me postë, jo vetëm vijnë në vendin tonë, por edhe kalojnë nga me destinacion Britaninë e Madhe. Dërguesit janë shtetas amerikan”,tha Arbër Zemani, shef i sektorit të trafiqeve dhe narkotikëve, policia Tiranë.
Po përse kjo lloj droge njohur si Yellow Zushi kërkohet kaq shumë nga tregu shqiptar.
“Kryesisht konsumohet nga adoleshentët dhe personat deri në 30 vjeç. Është një drogë e kushtueshme për shkak të THC-së së lartë, dhe kultivimi i saj kërkon kapacitet. Kultivimi i saj bëhet me llampa të mëdha në shtete si SHBA, Kanada, Tajlandë ku ështe i legalizuar kanabisi. Ndërsa në vendin tonë bien shumë në sy, për shkak të vëmendjes që policia i jep shtëpive të barit”, shprehet Zemani.
Ndër të tjera Zemani tregon se blerja e këtij lloj kanabisi bëhet përmes rrjeteve sociale ndërsa pagesa përmes institucioneve që transferojnë para.
Vetëm në 15 muajt e fundit në vendin tonë janë goditur 24 raste të trafikut të kanabisit me postë apo përmes fluturimeve ajrore, ku vlera e drogës së sekuestruar arrin në disa milionë Euro.
