Kategoria Superiore për sezonin 2023-2024 do të nisë me dy ndeshje Egnatia-Skënderbeu dhe pastaj Vllaznia-Kukësi.
Sezoni i ri futbollistik do të ketë katër faza, ndërsa në përfundim të javës së 36- të, ekipet e renditura në katër vendet e para do të përballen në një fazë “play off” që do të quhet “Final 4”.
Ekipi fitues i titullit kampion do të shpallet skuadra që grumbullon më shumë pikë në tri ndeshjet “play off”. Të katra ekipet e nisin me 0 pikë dhe ndeshjet do të luhen të gjitha në stadiumin “Air Albania”.
Në lidhje me nisjen e edicionit të 85 të Kategorisë Superiore, presidenti i FSHF Armand Duka dha një mesazh për protagonistët e futbollit në vend.
“Nisim sot edicionin e 85-të të “Abissnet Superiores”, rrugëtimin e një kapitulli plot emocione dhe adrenalinë që dhuron futbolli. Një kampionat i ri që jam i sigurt se do të jetë shumë konkurrues, edhe më i bukur se ai i sezonit të kaluar, duke na ofruar përmes ndeshjeve adrenalinë dhe garë të lartë, respekt në fushën e lojës mes kundërshtarëve ashtu siç i ka hije lojës tonë të bukur.”
Sipas kreut të institucionit të futbollit vendas, risitë e këtij sezoni do të jenë një histori suksesi.
Duka mendon se vetëm nëpërmjet një gare të fortë, me më shumë ndeshjeje kompetitive ekipet shqiptare do të jenë më konkurruese në nivel rajonal dhe atë europian.
