Një prej kamikazëve, të identifikuar tashmë i moshës 16 vjeçare kishte biletë dhe tentoi të hynte në stadium për të kryer krimin brenda tij. Por ai u ndal në hyrje nga punonjësit e sigurisë, dhe në ato momente aktivizoi bombën pranë njërës prej portave hyrëse. 3 minuta kamikazi i dytë hodhi veten në erë pranë një tjetër hyrjeje. Sipas hetimeve, plani ishte që shpërthimet të ndodhnin brenda stadiumit, për të shkaktuar më shumë viktima. Detajet u dhanë në një konferencë të posaçme nga Kryeprokurori i Parisit Fransua Molin.
Molin deklaroi se terroristi që u hodh në erë jashtë stadiumit më herët kishte tentuar të hynte brenda. Pranë tij u gjet një letërnjoftim, i cili thoshte se ai kishte lindur në Siri në vitin 1999.
“Deri tani dimë një terrorist të identifikuar nga shenjat e gishtërinjve. Ai ka lindur në vitin 1985 dhe është i njohur nga autoritetet, pasi kishte rekorde kriminale. Në 2012 ka qenë në listë si person radikal, por jo i lidhur me sulme terroriste. Ndërsa ai që tentoi të hynte në stadium ishte 16vjeçar i lindur në Siri në vitin 1999”, tha kryeprokurori. Sipas tij dyshohet se sulmi ishte i koordinuar nga 3 celula terroriste.
Ja deklarata e kryeprokurorit të Parisit
Një shpërthim ndodhi në portën D të stadiumit, dy trupa u zbuluan, një prej tyre i kamikazit. Viktima tjetër ishte një kalimtar. Pastaj ndodhi sulmi me kallashnikov në një lokal. Ka qenë një makinë e zezë, “Seat” me të cilën ka mbërritur autori. Shpërthimi i dytë ndodhi në portën H të stadiumit, ku është gjetur trupi i kamikazit të dytë me brez shpërthyes, njësoj si i të parit. Në 21:32 pati sërish sulm me të shtëna, 5 të vdekur e 8 të plagosur. 100 gëzhoja u gjetën.
Në 21:36 në një tjetër restorant 19 të vdekur nga të shtënat, dhe sërish mbërritën njerëz me një makinë të zezë “Seat”. Në 21:40 në bulevardin “Volter”, pati një sulm vetëvrasës, shpërtheu një brez i njëjtë me ato të kamikazëve të stadiumit. Në 21:40 sërish një mjet i zi, ndaloi para Bataclan dhe 3 persona hapën zjarr gjatë koncertit dhe u përpoqën të merrnin peng turmën. Aty ishin viktimat më të shumta. 20 min pas mesnatës 3 terroristë u vranë, të tjerët shpërthyen eksplozivët. Kjo është ajo çka ndodhi saktësisht”, ka deklaruar prokurori i Parisit.
Më tej ai informoi se një terrorist që mori pjesë në masakrën në Bataclan u identifikua nga gishtërinjtë. “Ka lindur në 1985, kishte rekorde kriminale, i njohur nga autoritetet. Asnjëherë s’ka qenë në gjyq. Në 2010 ka qenë në listë si element radikal, por asnjëherë i lidhur me ndonjë akt terrorist. Një prej kamikazëve të stadiumit, ka lindur në 1999 në Siri, nuk njihej nga autoritetet franceze. Armët kanë qenë kallashnikovë dhe brezat shpërthyes të të njëjtit lloj. Për sa i përket automjeteve, analizat e videove dhe dëshmitë, kemi identifikuar një “Seat” të zi me targë belge. Është dhënë me qira nga një francez rezident në Belgjikë. Ka një bashkëpunim të autoriteteve franceze dhe belge. Autoritetet belge lëshuan një deklaratë, ku njoftuan arrestimin e 3 personave. Kërkimet po vazhdojnë në Belgjikë. Të 3 të arrestuarit janë rezidentë në Belgjikë dhe nuk ishin të njohur për inteligjencën franceze. Sa i përket financimit, u mor përsipër nga shteti islamik. Autoritetet po hetojnë. Shpreh edhe njëherë gjithë keqardhjet për viktimat.
