Nuk ndodhemi në asnjë zonë franceze siç mund të na gënjejë emërtimi. Jemi në bashkinë Kamëz, aty ku emërtimet e rrugëve dhe panorama mjedisore janë në kontrast të thellë.
Banorët e kësaj rruge, gati në qendër të kësaj bashkie janë të revoltuar për këtë ndotje të lartë, ku mbeturinat jo vetëm që nuk pastrohen, por edhe digjen.
Shenjat e djegieve nëpër mure janë të dukshme….
“Këtu ne na kërcënohet jeta, dritaret nuk i hapim se po ti hapim, na vijnë gazrat kanceroz, kushedi sa herë kam marrë policinë se do na digjet dhe shtëpia. Landfill është këtu? Kam dy fëmijë të vegjël.
Është një gjende e padurueshme edhe në Afrikë nuk ndodh kjo”, thonë banorët.
Banorët tregojnë me gisht bashkinë dhe e akuzojnë si përgjegjëse e neglizhencës, teksa vetë kanë pastruar mbeturinat disa herë.
“E kam pastruar tre herë këtë, tre herë”, thotë një banorë.
Më të rrezikuar janë fëmijët e shumtë të kësaj rruge, të cilët, këtë fushë me mbeturina, e kanë edhe fushën e tyre të lojës.
“Ne na shqetësojnë sepse ka mbeturina dhe rrezikojmë për ndonjë sëmundje”, thonë fëmijët
Banorët e kanë për këtë gjendje edhe një argumentim politik.
“Bashkia është në gjumë total as nuk donë t’ia dijë. Këtu qendra dominon e majta dhe ai nuk ka investuar fare këtu, ne na ka diskriminuar që kur ka marrë pushtetin”, shprehen banorët.
Sipas banorëve të rrugës “Paris” problem ngelen bodrumet poshtë pallateve, që janë mbushur me ujëra të zeze, të cilat nuk kanë nga dalin. Report TV pyeti Bashkinë Kamëz se pse kjo zonë është katandisur në këtë gjendje. Zyrtarisht, bashkia thotë se situata është rënduar për shkak të disa zjarreve të rëna në disa venddepozitime mbeturinash dhe se po punohet 24 orë pa ndërprerje për normalizimin e situatës.
