Ngjarja e rëndë ndodhi në lagjen “Zinxhira” të Gjirokastrës. Ajnasi, pjesë e komunitetit rom që jeton në këtë lagje, po ecte në një prej rrugëve të saj kur është përballuar me katër të rinj.

Autorët treguan në Polici se ka qenë një grindje e çastit dhe pasi e kanë shtyrë dhe goditur viktimën, ai është rrëzuar në tokë duke u vrarë në kokë dhe më pas gjeti vdekjen.

Por, kamerat treguan se autorët e zhvendosën trupin e viktimës duke e vendosur në bordurën e rrugës në krahun tjetër për të mbështetur variantin se ai u vra aksidentalisht.

Ata janë larguar fillimisht, për t’u rikthyer më pas sërish, duke pretenduar fillimisht para dëshmitarëve që kalonin në rrugë se e kishin gjetur viktimën në rrugë të plagosur. I riu vdiq rrugës për në Spitalin e Gjirokastrës.

Ngjarja ka shkaktuar irritimin e banorëve të lagjes që tregojnë se familjet e të katër autorëve nuk janë pjesë e komunitetit të tyre që banon në këtë lagje prej 20 vitesh. “Kanë ardhur këtu para tre vjetësh, nga Elbasani dhe Berati. Por vetëm probleme na kanë nxjerrë. Janë hajdutë, vrasës, terroristë janë”, thonë ata.

“Kam djalin të vogël dhe një ditë e kërcënuan me thikë. Tremben fëmijët të dalin rrugëve kur janë ata këtu”, thotë një tjetër banore e lagjes. “Pas kësaj që ndodhi, asnjë nga ne nuk ka siguri. Është turp të vrasim njëri–tjetrin dhe përse? Ne të gjithë fukarenj jemi. Por ata djem janë të ligj. Duam të na i largojnë që këtej”, shprehen ata. Panorama