Partia opozitare LSDM akuzoi ministrin e brendshëm maqedonas, Pançe Toshkovski dhe partinë në pushtet VMRO DPMNE për arratisjen e Artan Grubit.
LSDM-ja thotë se me pretendimet se kamerat në pikën kufitare Bllacë nuk kanë funksionuar në momentin kur Grubi ka kaluar, kjo ministri po tallet me publikun. Opozita njoftoi gjithashtu se shumë shpejt do të publikojë informacione që dëshmojnë sipas saj përfshirjen e Toshkovskit dhe institucionit që ai drejton në arratisjen e Grubit.
Ishte vetë kjo ministri sakaq që lëshoi urdhërarrestin ndërkombëtar për ish zëvendëskryeministrin, njëkohësisht ish anëtar i Bashkimit Demokratik për Integrim. Kryeministri maqedonas, Hristijan Mickoski doli një ditë më parë me pretendimin se Grubi është larguar së bashku me një biznesmen nga Maqedonia e Veriut në drejtim të Kosovës në 15 dhjetor, me një automjet me targa diplomatike. Artan Grubi dhe ish-drejtori i Lotarisë Shtetërore, Përparim Bajrami akuzohen “për përvetësim të pasurisë së paligjshme”, nga kjo Lotari, ndërsa dëmi i shkaktuar vlerësohet të jetë rreth 8.2 milionë euro.
Grubi, i cili më 9 dhjetor u fut në listën e zezë të SHBA-së për korrupsion, i ka mohuar akuzat për arratisje, duke deklaruar se ndodhet jashtë vendit për një “vizitë private”. Ai madje pretendon se për këtë vizitë e ka informuar edhe rojet personale policore.
