Në gjyqin ndaj deputetit Armando Prenga kanë dëshmuar dy efektivë policie, Bujar Hadaraj dhe Rasim Bercaj. Ata kanë dhënë versionin e tyre për ngjarjet në komisariatin e Laçit, duke thënë se në atë ditë, kamerat e sigurisë nuk kanë filmuar asgjë. Kjo e dhënë ka dalë nga efektivi Rasim Bercaj ndërsa polici tjetër ka thënë se ka dëgjuar dy të shtëna.
“Atë ditë kamerat nuk ishin të ndezura në Komisariat. Nuk më thanë që kamerat nuk ishin të ndezura”, ka thënë efektivi Rasim Bercaj.
Ndërsa Bujar Haderaj, specialist drejtimi në sallën operative të Komisariatit të Policisë Laç, ka thënë se “ka dëgjuar 2 të shtëna”.
Avokati Baftjar Rusi e ka quajtur jo normale mungesën e kamerave të sigurisë. “Nuk është normale që një komisariat policie që ka pasur dhe të shkuar jo fort të mirë të mos vëzhgohej nga kamerat e sigurisë”, ka thënë Rusi
Ndërkohë në seancën e sotme kanë qenë të thirrur edhe dy dëshmitarë të tjerë, Ylli Vata dhe Ndue Cuni por ata nuk janë paraqitur.
Deputeti socialist, Armando Prenga akuzohet për “Armëmbajtje pa leje”, “Plagosje të lehtë me dashje” dhe “Kanosje”, pas një konflikti që pati me familjen Cali për lagunën e Patokut.
