Ish-presidenti i Bayernit, Uli Hoeness, është liruar me kusht nga burgu, pasi ka kaluar gjysmën e dënimit prej tre vjet e gjysmë për evazion taksash, ka bërë të ditur ministria e drejtësisë e landit të Bavarisë.
Hoeness, ish-lojtar i bavarezëve dhe manaxher i klubit për 30 vjet para se të bëhej president më 2009, u dënua në mars 2014 për mospagim taksash me vlerë 28.5 milionë euro.
Ai dha dorëheqjen nga posti dhe nisi burgun në qershor 2014. Nga fillimi vitit të kaluar pati mundësi të dilte nga burgu gjatë ditës, për të punuar në sektorin e të rinjve të klubit, ndërsa netët i kalonte në qeli.
Nuk është ende e qartë nëse do të rikthehet përsëri në klub me funksionet e mëparshëm.
Hoeness u akuzua fillimisht për 3.5 milionë euro taksa të papaguara për investimet në bursë përmes një llogarie bankare në Zvicër. Por, kur nisi gjyqi, ai pranoi se kishte shumë më tepër detyrime të papaguara, 18.5 milionë euro. Shifra më pas shkoi në 28.5 milionë, e pranuar edhe nga ekipi mbrojtës i Hoenessit.