Përfaqësuesja e Lartë për Çështjet e Jashtme të Bashkimit Europian, Kaja Kallas do të vizitojë sot Kosovën. Ajo nisi të mërkurën një tur ballkanik ku vizitoi Serbinë dhe pritet të shkojë edhe në Maqedoninë e Veriut.
Në një reagim në rrjetet sociale, Kallas u shpreh se do të takohet me qeveritarë të këtyre shteteve dhe shoqëritë civile për të diskutuar mbi rrugën e tyre drejt Bashkimit Europian.
Ajo tha se dialogu mes Prishtinës dhe Beogradit është një domosdoshmëri për të ecur përpara drejt kësaj rruge.
“Dialogu Prishtinë-Beograd është domosdoshmëri për të ecur përpara. Tashmë është koha për t’u riangazhuar”, shkroi ajo në “X”.
Pikërisht dialogu ishte edhe në fokus të diskutimeve me presidentin serb, Aleksandër Vuçiç. Ky i fundit u shpreh pas takimit me Kallas se Serbia është e angazhuar për një dialog konstruktiv nën mbikëqyrjen e Bashkimit Europian, por krijimi i Asociacionit mbetet kusht.
“I kujtova se krijimi i Asociacionit të Komunave me shumicë serbe nuk është vetëm një detyrim i dakorduar, por edhe një kusht paraprak për përparim të mëtejshëm në dialogun dhe çdo normalizim të marrëdhënieve,” shkroi Presidenti i Serbisë.
Sa i përket vizitës në Kosovë, ngërçi institucional që po kalon Prishtina ka bërë që BE-ja në njoftimin për vizitën e përfaqësueses së lartë të mos specifikojë me kë do të zhvillojë takime ajo.
Ajo çfarë dihet për vizitën e saj në Kosovë është se do të ketë takime me përfaqësues të partive politike dhe të shoqërisë civile, ndërsa do të mbajë një konferencë për mediat, në zyrën e BE-së në Kosovë.
Ajo do të vizitojë edhe misionin e BE-së të sundimit të ligjit, EULEX, dhe do të takohet po ashtu edhe me komandantin e KFOR-it. Pas Kosovës, Kallas do të qëndrojë në Shkup.
