Kalbëzimi i një elite!

Nga Brizida Gjikondi

Dikujt i është dhënë një autorizim për shtëpi, dikujt i është rregulluar gruaja, fëmijët ose të afërmit nëpër punë të mirëpaguara në cdo hierarki që ka shteti shqiptar brënda dhe jashtë, dikutj i është dhënë kredia me interes zero, dikujt buxhet informal për portalin, dikujt dekorata për egon dhe deliret, dikujt territore dhe prona publike, dikujt një ligj, dikujt një minierë, një liçencë, një bankë, dikujt …. dmth kësaj dite që erdhëm i është bërë yzmeti, ndaj ushtria e yzmeqarëve pavarësisht vanitetit, jetës, pasurive dhe rraqeve firmato që mbajnë janë thirrur që siç janë të helmuar vetë nga mëkati të orientojnë dhe helmojnë dhe shqiptarët në qasjen dhe analizën e tyre ndaj të keqes. Janë thirrur nga “nderëbërësi”, pasi për këtë ditë i ushqeu, fiks si përralla e Hansel dhe Gretel, që i ushqyen që në fund ti shqyenin të majmë.

Të gjitha këto “ndere” dhe shumë të tjera që nuk janë renditur këtu janë bërë në kurriz të Shqipërisë dhe moralit kombëtar të shqiptarëve,

Këto “ndere” dhe këta yzmeqarë të së keqes, kanë kontribuar që sot shqiptarët dhe ana morale e një kombi të jetë në një krizë te thellë.

Relativizimi, ambjentimi me të keqen dhe sidomos justifikimi dhe mbrojtja e saj, janë dëshpëruese dhe radiografia më e mirë e elitës aktuale shqiptare.

Pavarësisht se fshihen mbrapa analizave gjoja moraliste dhe filozofike, aroma e kërmës dhe kalbëzimit moral nuk fshihet dot mbas asnjë citimi, trashje zëri ose cv’je show-man’i.

Këtë elitë këto ditë e kemi parë të bëjë, prokurorin, gjyqtarin, policin, por kurrësesi rolin e saj të vërtetë, mendimin progresiv dhe ndriçues kombëtar.

Elita duhet të ketë të zhvilluar jo vetëm inteligjencën mendore por sidomos atë shpirtërore, kombëtare sidomos. Nëse këto dy iteligjenca nuk ecin në një kah atëherë kemi dizekuilibër dhe kompromentim të së parës, nga materialja siç po ndodh.

Tragjikisht pjesa më e madhe e elitës shqiptare të kësaj epoke, zot ka paranë. Aty fillon, boshti gjykimi dhe orientimi i saj. Shembulli saj i infektuar dhe roli i saj si katalizator i së keqes uroj të jetë në grahmat e saj të fundit bashkë me imoralitetin e ushqyesve të saj.

Gjykimin e shëndetshëm, moralin e kthjellët kombëtar përherë e has tek shqiptarët e ndershëm dhe të thjeshtë, ata që kjo elitë në mënyrën e saj shpesh dinake dhe shpesh miope i ka trajtuar si poppull jo të vetin, përkundrazi, si një popull armik.

Shqiptarët, Shqipëria e kësaj epoke kanë një elitë të pasur në para por jo në shpirt dhe moral. Këto ditë lakuriqësia e saj imorale ishte reale.

Shkrimet e shenjta preçizojnë që nuk mund tu shërbesh dhe tu falesh dot dy Zotave njëkohësisht, edhe zotit të parave edhe Zotit të shpirtit dhe në rast se ti zgjedh të parin… dhe ty të duket sikur je i pari në këtë epokë të infektuar, mos harro, të parët do jenë të fundit, dhe të fundit të parët.