Një qytezë në Spanjë ka marrë një vendim të guximshëm. Përmes një referendumi popullor, 330 banorët e Trigeros del Vajes, qytezë pranë Vajadolidit, unanimisht votuan një akt që i konsideron kafshët si “banorë jo-humanë”.
Kryebashkiaku socialist Pedro Perez Espinoza e cilësoi vendimin si pozitiv dhe theksoi përgjegjësinë për të përfaqësuar dhe respektuar vullnetin e popullit si dhe të drejtat e miqve felinë dhe kaninë. “Qentë dhe macet kanë jetuar mes nesh për më shumë se një mijë vjet. Kryetari i bashkisë duhet të përfaqësojë jo vetëm banorët humanë, por edhe të tjerët”, tha ai.
Megjithatë ende nuk është plotësisht e qartë se si do të zbatohet ky ligj, veçanërisht si do t’i prekë ai të drejtat e pronarëve për t’i dhënë fund jetës së kafshëve me sëmundje të rënda.
Ligji në fjalë, më shumë sesa për të drejtat e kafshëve në vetvete, mendohet të jetë një hap drejt heqjes së luftës me demat pasi ndalon çdo “veprim që shkakton gjymtimin apo vdekjen e banorëve jo-humanë”.
Në fakt, kjo nuk është e para herë që njerëzit kanë qasje të tillë në marrëdhëniet me kafshët. Në 2013-ën, India i shpalli delfinët dhe balenat si “persona jo-humanë”, duke u dhënë të drejta. Edhe pse jo të drejta të njëjta si njerëzit, ligji i dha fund përdorimit të delfinëve dhe balenave për shfaqje argëtimi në parqet ujore.
