Kryetari i Kuvendit të Kosovës, Kadri Veseli ka reaguar për protestën e të shtunës të opozitës përmes një komunikate për media. Sipas tij protesta e sotme kishte një fillim dinjitoz, por përfundim dëshpërues. Kurse ka theksuar se këto veprime i gëzojnë kundërshtarët e pavarësisë së Kosovës, ndërsa frikëson qytetarët e Kosovës, transmeton Koha.net.
“Protesta e sotme kishte një fillim dinjitoz, me një përfundim dëshpërues. Dhunimi i shtetit në forma të tilla të zjarrvënies së institucioneve entuziazmon kundërshtarët e pavarësisë së Kosovës, zhgënjen partnerët ndërkombëtarë të shtetit tonë dhe dëshpëron e frikëson qytetarët që duan t’i rrisin fëmijët e tyre në këtë vend. Sa nuk është bërë vonë duhet reflektuar. Kjo nuk është Kosova që duan qytetarët e saj. Mbështetje Policisë së Kosovës e cila sot dëshmoi një profesionalizëm të nivelit më të lartë në mbrojtjen e institucioneve, jetës dhe pronës së qytetarëve”, ka thënë Veseli.
