Pesëdhjetë e pesë punonjës të Kadastrës së Vlorës kanë kundërshtuar sërish vendimin për zhvendosjen e institucionit drejt Tiranës. Prej dy ditësh ata kanë kundërshtuar këtë vendim, i cili sipas tyre ka ardhur në mënyrë të beftë dhe të papritur.
Punonjësit shprehen se zhvendosja është e pamundur për shkak të kushteve familjare, pasi shumica prej tyre kanë familje, prindër dhe fëmijë, çka e bën të pamundur lëvizjen e përditshme apo transferimin drejt Tiranës për të ushtruar detyrën.
Kundërshtimi ka qenë i fortë, madje edhe nëndrejtori i Kadastrës së Vlorës Sokol Shehaj është shkarkuar nga detyra pasi ka mbështetur punonjësit.
Në një prononcim për mikrofonin e RTSH, ai deklaroi se lirimi i tij nga detyra ka ardhur si masë ndëshkuese për nënshkrimin e peticionit.
“Unë e nënshkrova peticionin, iu bashkova punonjësve. Nisur dhe nga eksperienca e mëparshme që Drejtoria vendore ka qenë gjithmonë në qytetin ku duhej të ishte, aty ku janë pronat dhe s’mund të lëvizin në qytete të tjera. Kjo ishte arsyeja përse mbështeta të gjithë punonjësit dhe për arsyet e tyre familjare.
Një ditë më parë ka ardhur një e-mail për lirim tim nga detyra si masë ndëshkuese për nënshkrimin e peticionit”, deklaroi ai.
Ndërkohë, afati i fundit për zhvendosjen është fundi i muajit, periudhë gjatë së cilës duhet të spostohet edhe baza materiale e institucionit. Pas kësaj, sipas punonjësve, mbetet e paqartë se çfarë do të ndodhë me ta.
Ata kërkojnë mbështetje nga mediat, por edhe nga institucionet përgjegjëse, deputetët dhe përfaqësuesit politikë të qytetit të Vlorës.
