Ish deputeti demokrato-socialist Kastriot Islami nuk sheh ndonjë ndryshim në qeverinë e re të mandatit të tretë socialist, të prezantuar nga Edi Rama disa ditë më parë.
Ai thotë se ajo do bjerë për disa orë.
“Unë e shikoj situatën si të një pellgu në stanjacion, të qelbur që ka prej vitit 2013 që është ndotur dhe vijon të ndotet me grabitje, korrupsion, PPP dhe grabitja e votave dhe kjo e ka bërë situatën të pakorrigjueshme”, tha Islami, i ftuar në Ditarin e A2 CNN.
“Është një pellg që rrinë bashkë. Këtë radhë ka dhe 2-3 element që vijnë nga zhvillimet globale. Të gjithë bashkë kanë një të përbashkët klientelizmin. Ka një mungesë të qartë të veprimit, janë mediokër”.
Sipas ish-ministrit të Jashtëm, pavarësisht se disa kanë ikur dhe disa janë spostuar, të gjithë i bashkon frika. “Frika e asaj që ndodhi në Afganistan. Në Afganistan, një sistem i korruptuar dhe i kalbur, i mbështetur dhe nga jashtë, përfundoi me largimin e presidenti Ghani që kishte grumbulluar lekët dhe donte të largohej jashtë dhe me një ushtri që nuk rezistoi”, tha Islami.
“Dhe pikërisht këta kanë këtë frikë. Ata kanë frikë se ajo që ndodhi në Afganistan mund të ndodhë dhe në Shqipëri. Nëse në Afganistan u deshën disa ditë, regjimi këtu mund të bjerë për disa orë. Këta kanë kohë që kanë frikë, por nuk kishin një shembull dhe ajo që ndodhi në Afganistan bëri që të shtohet frika”.
/m.j
