Lajmi i zbarkimit të kryeministres italiane Giorgia Meloni në Abhu Dhabi për të nënshkruar një marrëveshje me vlerë rreth një miliard euro që përfshin ndërtimin e një lidhjeje nënujore për transportin e energjisë elektrike, të prodhuar në Shqipëri me panele diellore fotovoltaike, eolike dhe hibride e të transportuar përtej detit Adriatik, ka pushtuar shtypin e vendit fqinj.
“Ne besojmë me forcë në këtë projekt që përfshin tre qeveritë tona, si dhe sektorin privat dhe operatorët e rrjetit,” citohet të ketë thënë shefja e ekzekutivit italian teksa njoftonte ujdinë gjatë punimee të samitit Botëror të Energjisë së të ardhmes, së bashku me kryeministrin shqiptar Edi Rama dhe presidentin e Emiratëve, sheikun Mohammed bin Zayed.
Mediat italiane japin disa detaje nga marrëveshja, e cila sipas tyre, parashikon prodhimin e energjisë në Shqipëri, dhe dërgimin më pas në Itali përmes kabllove nënujore nëpërmjet operatorit italian Terna dhe Kompanisë Kombëtare të Energjisë së Emirateve të Bashkuara Arabe.
Infrastruktura do të lidhë portin shqiptar të Vlorës me Pulian, në pikën më të afërt mes dy vendeve. Objekti pritet të hyjë në funksion brenda maksimumit tre vjetësh. “Nëse duam të realizojmë një tranzicion konkret dhe të qëndrueshëm energjetik, duhet të sigurohemi që ai të kryhet me infrastrukturën e duhur.
Zhvillimi i ndërlidhjes mund të jetë çelësi për një diplomaci të re energjetike, për të shumëfishuar mundësitë e bashkëpunimit dhe për të gjeneruar përfitime për të gjithë ne së bashku”, ka deklaruar Meloni.
E ardhmja e tranzicionit të energjisë dhe dixhitalizimit – ka shtuar ajo, do të varet nga aftësia jonë për të gjetur një ekuilibër midis qëndrueshmërisë dhe inovacionit”, teksa nuk ka lënë pa përmendur edhe fuzionin bërthamore, duke kujtuar se ai mund të prodhojë energji të pastër, të sigurtë dhe të pakufizuar.
