Njëri nga poetët më të mëdhenj bashkëkohor, John Ashbery, ka vdekur në moshën 90-vjeçarem transmeton “Koha Ditore” njoftimin e DW. Vlerësimet e kritikës në vitet ‘70 e shndërruan atë nga një eksperimentalist avantgard në një prej poetëve më të rëndësishëm të Amerikës.
Poeti ka vdekur, të dielën, në Hudson. Përmbledhja e tij me poezi e vitit 1975, “Self-Portrait in a Convex Mirror”, ishte fituese e kurorës së trefishtë më të rëndësishëm në botën e librit: çmimit “Pulitzer”, çmimit Kombëtar të Librit (National Book Aëard) dhe çmimit të kritikëve “National Book Critics Circle”.
Poema sipas së cilës është titulluar përmbledhja konsiderohet të jetë një nga kryeveprat e fundshekullit njëzet në poezinë amerikane.“Asnjë figurë tjetër nuk duket aq e madhe sesa John Ashbery, në gjithë poezinë amerikane në 50 vjetët e fundit dhe asnjë poet amerikan nuk ka vokabular më të madh e më divers sesa ai”, kishte shkruar Langdon Hammer, kryesues i Departamentit të Anglishtes në “Yale University” në vitin 2008.
Ashbery ishte i njohur edhe si përkthyes dhe kritik. Shpeshherë ai kishte shkruar si kritik arti për “New York Herald-Tribune” në Evropë, për revistat “New York”, “Newsweek” dhe “Partisan Review”. Ka përkthyer vepra të shkrimtarëve, Arthur Rimbaud, Raymond Roussel dhe shumë të tjerë francezë.. (b.an)
