E ndërsa për kreun e Partisë Demokratike, Sali Berisha, zgjedhjet e 11 majit janë thjesht një farsë elektorale, ai shton se fitimi forcës së tij politike nuk mund të vijë nga kjo “farsë”.
Në emisionin “Opinion” në Tv Klan, Berisha u shpreh sikurse herë të tjera që PD-ja nuk i njeh këto zgjedhje, e se kërkon një qeveri teknike.
Për kryedemokratin ekzistojnë vetëm dy plane, ai i mbrojtjes së votës së lirë siç shprehet ai, e se dyti, krijimin e një qeverie teknike. Por sa do e arrijë Berisha një gjë të tillë? Kjo nuk është e qartë, sepse vetë kryedemokrati shprehet se do e detyrojë partinë në pushtet ta pranojë këtë kërkesë të tij, por mënyra se si nuk sqarohet.
Fevziu: A ka ndonjë shans PD të vijë më në pushtet?
Berisha: PD dhe asnjë parti në botë, në farsë nuk fiton.
Fevziu: Po si do bëni?
Berisha: Nuk fiton!
Fevziu: Si do fitoni?
Berisha: Ka mënyra të tjera.
Fevziu: Që janë?
Berisha: Nëse Edi Rama është i vendosur të mbajë në çdo çmim karrigen, shqiptarët do luftojnë me çdo çmim për votën e lirë.
Fevziu: Po si? Njerëzit ju ngrihën më për protesta?
Berisha: Tani, njerëzit… Çfarë po bëjmë ne? Ne po mbrojmë votën para shqiptarëve dhe botës, çka nuk është bërë më përpara. Po të ishte bërë në 2021, nuk ishte kaq në shkallë, por kishte motive, nuk do ishim sot këtu. Po të ishte bërë në 2021, sot…
Fevziu: Atëherë, cili është plani juaj?
Berisha: Plani im është ky. Do të përfundojmë këtë proces me sukses, të mbrotjes së votës. Plani tjetër, nuk njohim zgjedhjet dhe krijimin e një qeverie teknike për zgjedhje të lira.
Fevziu: Po s’ua jep këtë.
Berisha: Po s’i dha, ne do bëjmë çdo gjë ta detyrojmë.
