Nga Skënder Minxhozi/
Po bën xhiron e mediave dhe internetit, një video ku shfaqet kryeministri aktual Edi Rama i cili lavdëron publikisht kandidatin e sotëm demokrat për bashkinë e Tiranës, Halim Kosovën. Video është sjellë në vëmendjen e publikut nga stafi i fushatës së zotit Kosova, për të provuar “me fakte në dorë” konsideratën e Ramës për atë vetë si person dhe si profesionist.
Që një garë elektorale të bazohet mbi qëndrimet, deklaratat dhe detajet e tjera të së shkuarës së kundërshtarit, kjo është mëse e kuptueshme. Për më tepër që spoti në fjalë nuk përmban asnjë fyerje direkte për kryeministrin Rama. Nga kjo pikëpamje Halim Kosova është treguar krejt korrekt dhe me integritet gjatë gjithë fushatës së tij. Çeshtja në këtë mes është një tjetër. Kur Halim Kosova përsërit thuajse çdo ditë që Edi Rama ka konsideratë për të, që i ka propozuar poste të larta në hierarkinë e shtetit, që e ka vlerësuar dhe lëvduar rregullisht punën e tij, nuk është se ka arritur ndonjë sukses të madh në balancat e fushatës së tij politike kundër vetë Ramës dhe indirekt edhe kundërshtarit të tij Veliaj.
Sepse, për një ironi të thjeshtë të fatit, liderët politikë në përgjithësi dhe ata shqiptarë në veçanti, shquhen për paqëndrushmëri në deklarimet, pozicionet politike dhe raportet me të tretët. Për shembull, ka qenë një kohë, në fillimet e pluralizmit shqiptar, kur Sali Berisha dilte para turmave të dëshpëruara duke folur pozitivisht për “presidentin Alia, rolin e tij gjatë luftës dhe gjatë kalimit nga diktatura në demokraci”. Ka qenë gjithashtu një kohë, vjen fjala, kur Ilir Meta mbante në këmbë për katër vjet rresht, pushtetin e djathtë në jëtë vend, kurse sot i kujtojnë se ka qenë një “spiun i Berishës, kundër Nanos”. Ka qenë gjithashtu një kohë, jo fort larg, kur Lulzim Basha deklaronte publikisht se opozita nuk do të hynte në zgjedhje me këtë ndarje territoriale, por sot është në fushatë së bashku me zotin Kosova. Ka qenë një kohë, për shembull, kur Berisha e quante Nanon mafioz dhe vrasës, kur se Metën “Ilir floriri”, por më pas rrugët e tij u bashkuan me të dy këto personazhe.
Kjo tiradë që fillon me “ka qenë një kohë”, mund të zgjatej pafund, sepse e gjatë dhe plot kthesa është historia politike e këtij vendi. Në këtë kolanë të gjatë baleti e përdredhjesh verbale, konsiderata e Ramës për Kosovën është nga episodet më të lehta e të pafajshme, nëse mund ta quajmë kështu. Sepse Rama, ndër vite, është prishur e ndrequr me dhjetra njerëz, ashtu si kanë bërë edhe liderët e tjerë të majtë e të djathtë. Të thuash se e ke kapur “mat” kryeministrin me një paragraf ku lavdëron mjekun e përkushtuar Kosova, është të tallesh me inteligjencën e shqiptarëve. Të cilët kanë parë shumë më tepër dhe shumë më keq se kaq…
