Avokati i Ilir Metës, Kujtim Cakrani thotë se kanë nisur sulme të orkestruara mirë ndaj avokatëve.
Kjo, pas rastit të avokatit Besart Logu, që është njëkohësisht jurist në Partinë Demokratike.
“Nuk është rasti i parë Logu që po hetohet për këtë vepër penale. Kemi rastin e Lenës, që për të njëjtën vepër u akuzuar dhe u dënua.
Është e lehtë ti thuash një avokati që ti bën ndikim të paligjshëm. Të bësh ndikim të paligjshëm duhet të jenë dy ose më shumë persona. Kush e ka ushtruar këtë ndikim, te kush persona, tek gjyqtari, prokurori, kush janë këta persona, kur janë takuar dhe si, kush ka qenë biseda që këto kanë bërë?
Këto hetime dhe akuza më duken për të sulmuar avokatin. E them me bindje që është sulm ndaj avokatëve. Është sulm i orkestruar mirë ndaj avokatëve.
Ka nisur nga kryeministri se është ai që ka linçuar avokatët në media. Duan ta intimidojmë avokatinë dhe duan ta bëjnë si në ’45.
Problemi i madh i këtij vendi është korrupsioni i qeverisë dhe i institucioneve. Duhet të jemi të kujdesshëm kur diskutojmë për avokatët.
Është sulm që po bëhet ndaj avokatëve për të hequr vëmendjen nga problematikat që ka qoftë SPAK-u, qoftë GJKKO dhe prokuroritë dhe gjykatat e juridiksionit të përgjithshëm.
Logu është profesionist, me etikë nga pikëpamja profesionale. Do mbroj çdo lloj avokati nëse bëhet sulm ndaj tij”, tha ai për MCN.
Cakrani tha se ndaj tij është bërë një ankesë pas telefonatës së bërë me ish-presidentin Meta më 1 korrik të këtij viti, me pretendimin se ka cenuar sigurinë e burgjeve.
“Dje unë jam njoftuar nga Dhoma e Avokatisë sepse në datën 1 korrik në studion tuaj i kam hapur telefonin ish-presidentit të Republikës, zotit Meta.
Meqenëse i hapa telefonin, dhe ju si moderatore i bëtë disa pyetje unë paskam shkelur ligjin për avokatinë dhe ligjin për ekzekutimin e vendimeve penale.
I kanë bërë ankesë që të merren masa ndaj avokatit Cakrani se ka cenuar sigurinë në burgje E ka bërë drejtori i burgjeve Ervis Qose.
Se çfarë sigurie kombëtare është të flasësh në telefon ‘President si je” vetëm Qosja, një plebe e di. A është linçim ndaj avokatëve apo jo?”, tha ai.
